Mojdeh umukit ng 4th gold sa BP
MANILA, Philippines — Nasungkit ni Philippine national junior record holder Micaela Jasmine Mojdeh ang kanyang ikaapat na gintong medalya sa 2023 Batang Pinoy swimming competition kahapon sa Teofilo Yldefonso Swimming Pool sa Rizal Memorial Sports Complex sa Maynila.
Muling umarangkada ang tinaguriang ‘water beast’ ng Philippine swimming nang pagreynahan nito ang girls’ 400m Individual Medley sa bendisyon ng limang minuto at 12.63 segundo.
Malayo sa ikalawang puwesto si Maria Francesca Barreto na may naitalang 5:26.03 para magkasya lamang sa pilak na medalya habang pumangatlo si Liaa Amoguis na may 5:29.78.
“I am happy to get my personal best on my 50m fly and also in 50m breast splits of the 200m medley relay. I just tried to survive the 400m IM because I’m still a bit tired from my Winter Juniors Meet,” ani Mojdeh.
Nauna nang nakasungkit ng gintong medalya ang Brent International School standout na si Mojdeh sa 50m butterfly, 200m Individual Medley at 4x50m medley relay.
“I am thankful to Parañaque team coaches — coach Marlon, coach John, and to BEST coaches — to coach Jek for my recovery, to coach Sherwyn, coach Jeremiah and to Bellevue club Coach Abi Liu for the continuous guidance and believe in me,” dagdag ni Mojdeh.
Maningning din si Filipino-British Heather White na sumisid ng kaniyang ikatlong gintong medalya sa 50m freestyle habang pumangalawa lamang si Trixie Ortiguera na may 27.89 segundo at ikatlo naman si Raina Leyran na nagsumite ng 28.47.
Nakahirit din ang Paranaque tankers ng isang pilak at isang tanso.
Pumangalawa si Behrouz Mohammad Mojdeh — nakababatang kapatid ni Micaela Jasmine — sa boys’ 200m backstroke habang nakatanso si Hannah White — bunsong kapati ni Heather — sa girls’ 50m butterfly.
Sa Philippine National Games, humirit si Ruben White ng gintong medalya sa men’s 50m freestyle makaraang maglista ito ng 23.85 segundo.
Tinalo ni Ruben sina silver medalist Manuel Perez (24.49) at bronze medalist Jennuel De Leon (24.52).
- Latest
