Unicast abante semis, MRD tagak sa North Shooters Club Season 4

CEBU, Philippines — Wala kalahutay ang undermanned nga MRD sa linabnotay sa katapusang lingkoranan sa semis ug natagak kini batok sa Unicast sa ilang knockout quarterfinals, 76-83 sa North Shooters Club Season 4 Christmas League 2023 niadtong Huwebes sa gabii diha sa J&J gym sa Lilo-an, Cebu.

Labaw unta'g 22 puntos ang MRD sa halftime, apan nakaltasan kini'g 14 puntos kay walo ra sa ilang players ang nibutho sa korte.

Nausab ang dagan sa duwa sukad ang Unicast nakaigwalis, 52-52 paghuman sa third period. Gikan niadto, nagkagidlay na ang duwa sa MRD ug nakahimo na kini'g daghang turnovers. Gumikan kay nahutdan na'g pundo sa hangin, wala na mamalik og depensa ang pipila nila ka players.

Tungod niini gipahimuslan sa Unicast ang kahigayonan pinaagi sa ilang mga fastbreaks nga nakapahangak og maayo sa MRD.

Ang MRD ni team owner Mitchell Durban gipangulohan ni Don Rendon pinaagi sa iyang 18 puntos, gisundan ni Jon Troi Berame ug Aljun Noble nga dunay 12 puntos matag usa. Si Elmar Miscala miamot og 11 puntos, si Rajee Maquilan mitampo'g 10 puntos, samtang ang team captain nga si Cdu Pepito mitimbre'g otso puntos sa ilang pagpanamilit sa liga nga gidumala sa aktibo ug maabtikon nilang presidente Merlou Mercader ug sa bise presidente Arnold Astillero.

Si Japet Naingue mipabuhagay og 27 puntos aron mangulo sa opensa sa Unicast ni Lucas Suarez.

Harungon sa Unicast sa semis mao ang RJ Store ni Mark Louie Pepito. Sa dili pa mag-abot ang duha karong alas-9-15 sa gabii, magsangka una ang Hardway ni Jomart Molo batok Kamaru ni Merlou Mercader sa alas-8. Ang mga modaog maoy magtige sa finals, samtang ang mga pildero moduwa na lang alang sa ikatulong puwesto.

Ang knockout finals gitakda karong Disyembre 21 ug ang awarding himuon sa petsa 23 dungan sa ilang Christmas Party.