Para athletes nanawagan ng suporta

MANILA, Philippines – Nanawagan ng suporta ang national para athletes na sasabak sa 4th Asian Para Games na gaganapin sa Oktubre 22 hanggang 28 sa Hangzhou, China 

Mismong si Philippine Paralympic Committee President Mike Barredo ang humiling ng suporta sa mga kababayan nito para mas lalong ganahan ang mga para athletes na makasungkit ng medalya sa quadrennial meet.

“Our national para athletes have worked just as hard, if not harder, to compete in the Asian Para Games so I pray that our compatriots give them their all-out support as they gave our national athletes,” ani Barredo.

Umalis na ang unang bugso ng pambansang de­legasyon na sasabak sa Hangzhou — ang  parehong venue ng 19th Asian Games.

Una nang umalis sina Chef de Mission at former national swimming standout Ral Rosario kasama sina deputies Millette Bonoan at Irene Soriano-Remo para maihanda ang mga gagamitin ng delegasyon sa Hangzhou.

Optimistiko si Barredo sa laban ng Pinoy athletes sa edisyong ito ng torneo.

Manigning ang kampanya ng Pilipinas noong 2018 Asian Para Games sa Jakarta, Indonesia kung saan humakot ng 10 ginto, walong pilak at 11 tanso ang tropa.

Nanguna sa kampanya ng Pilipinas noon sina FIDE Master Sander Severino na may apat na ginto at para swimmer Ernie Gawilan na may tatlong ginto.

“I am guardedly optimistic because our athletes have been training very hard for this opportunity to compete in the Asian Para Games.This is why I told our coaches to relay to all of our athletes to stay positive. All of us should have a positive attitude,” ani Barredo.