Go may pa-bonus sa Alas Women

MANILA, Philippines — Matapos magbigay ng pa-bonus na tig-P500,000 sa mga Olympic-bound athletes ay binigyan naman ni Sen. Bong Go ng tig-P200,000 ang mga miyembro ng Alas Pilipinas Women.

Ito ay dahil sa makasaysayang bronze medal finish ng mga Pinay spikers sa nakaraang 2024 AVC Challenge Cup for Women na inilaro sa Rizal Memorial Coliseum sa Vito Cruz, Manila.

Nakatuwang ni Go ang Philippine Sports Commission (PSC) sa pamamahagi ng cash incentives sa Alas Pilipinas Women sa PSC conference hall sa Rizal Memorial Sports Complex.

“Itong financial support from PSC ay para makatulong sa kanila. Pero ang importante dito ay ang drive to win,” wika ng Senador. “At stake dito ang ating flag, ang ating bayan. Lagi kong sinasabi sa kanila na give your best.”

Bukod sa insentibo ay nagbigay din ang chairman ng Senate Committee on Sports sa mga Pinay spikers ng sapatos at relo.

Nakatakdang sumabak ang Alas Pilipinas Women sa darating na 2024 FIVB Challenger’s Cup na nakatakda sa Hulyo 4 hanggang 7 sa Ninoy Aquino Stadium sa Malate, Manila.

Ang torneo ang magsisilbing qualifying tournament sa Women’s Volleyball Nations League.

Personal na tumanggap ng financial support mula kay Go at sa PSC sina Jia De Guzman, Angel Canino, Eya Laure, Thea Gagate, Fifi Sharma, Vanie Gandler, Julia Coronel, Arrah Panique, Dawn Catindig, Jen Nierva, Faith Nisperos, Cherry Nunag at Dell Palomata.

Wala naman si Sisi Rondina.