Labing unang IBP Cebu Run malampuson
CEBU, Philippines — Nagmalampuson ang labing unang Integrated Bar of the Philippines (IBP) Cebu Run diin miabot ngadto sa 1,700 ka runners ang misalmot sa lumba alang sa mahinugndanong kawsa kagahapon didto sa Robinsons Galleria Cebu.
Si IBP-Cebu Chapter President Michael Francis Hubahib nagkanayon nga ang pundo nga ilang napupo gikan sa ilang kalihukan adto mapunta sa mga ligal ug medikal nilang misyon lukop probinsiya.
"We conduct free legal consultation for those who cannot affort expensive legal services. Usahay pakapinan namo og medical mission," matud pa ni Huhabib. "Last time, natuyok namo ang tibuok Cebu for legal aid pero gasto man gud mag-legal and medical mission so nag-organize mi ani nga run to generate funds for our programs."
Sa laing bahin, sila si Jhon Marc Dizon ug Artjoy Torregosa ang nanghawod sa makutas nga 21K division.
Si Dizon maoy labing paspas sa tanan. Mipatak siya og usa ka oras, 14 minutos ug singko segundos aron langkaton ang men's 21K title.
Si Torregosa ang gikoronahang rayna sa 21K sa oras nga 1:34:49.
Sila si Prince Lee (45:10) ug Evamie Villarin (52:04) ang nanghawod sa 12K action, sila si Ariel Saballa (20:31) ug Asia Paraase (23:46) ang midominar sa 6K, samtang si Kent Lloyd Lato (10:37) ug Gretchen Sambo (12:06) ang mipahiluna sa nag-unang puwesto sa 3K.
Sa lawyer's category, ang mga top finishers mao sila si Benjamin Uy (1:45:45) ug Luigine Chan (2:02:51) sa 21K, Jean-Paul Francisco (58:57) ug Hazel Caraballe (1:04:04) sa 12K, Karl Rainer Barcenas (39:22) ug Marydith Boltiador-Orio (1:34:10) sa 6K, ug Ron Christian Eupena (24:36) ug Hannah Mae Blanco (23:44) sa 3K.
- Latest
