Mga Pinoy sa New Zealand gipasalamatan sa Filipinas

CEBU, Philippines — Kun ang katawhang Pilipinhon maoy pasultihon, dako kaayo ang pagpasalamat ngadto sa 11-man team sa Filipinas, ang national women’s football team sa nasud nga mipildi sa New Zealand 1-0 sa nakalabay nga adlaw’ng Martes didto mismo sa atubangan sa liboan nilang kababayan sa Wellington Regional Stadium. Apan si Olivia McDaniel ang Pinay goalkeeper miingon nga dako ang iyang pagpasalamat sa ika-12th man sa koponan nga walay lain ang mga Pinoy fans nga niadto gyud didto sa stadium aron sila suportahan sa ilang kampanya.

Ang iskor ni Sarina Bolden ug ang dili kabayrang pagbantay ni McDanile ug ang gipakitang effort sa tanang miyembro sa team maoy nagdala kanila sa kung asa sila karon, ang makaduwa ug labaw sa tanan maka-iskor ug makadaog sa FIFA Women’s World Cup nga tanang football players maoy pangandoy.

Atol sa duwa, puno ang stadium sa mga fans, mayoriya niini mga Kiwis nga nisuporta sa ilang Football Ferns, apan wala sab magpalupig nga mga Pinoy community didto, nagmartsa sila ug nagsul-ob og mga tradisyonal nga Filipino costumes kauban ang ilang mga kapikas Kiwis ug mga anak nga Fil-Kiwis aron suportahan ang Filipinas.  Bisan tuod og dili sama kadaghan sa Kiwis, si McDaniel miingon nga mas lanog pa ang mga Pilipino didto sa stadium nga maoy nakapagana kanila. “I mean, I truly think I felt our fans were so much louder, that’s all I heard. We tried to make it seem like a home game and they really came through for us tonight, they were our 12th man today — all our kababayans who came out tonight,” matud pang McDaniel.

Karong adlaw nga Domingo, Hulyo 30, atubangon sa mga Pinay ang wala pay daog apan World No.12 nga Norway didto sa Auckland sa alas 3 sa hapon (sa Pilipinas) aron mahatan og tsansa nga makasulod sa Final 16.

Kinahanglang maka-upset o modaog ang Pilipinas batok sa Norway aron makakuha og 6 puntos ug moabante sa sunod nga round nga way daghang kuskos-balungos. Kung dili man, bisan maka-draw o makatabla lang kini batok sa Norway apan ubanan sa pag-ampo nga makadaog unta ang Switzerland batok sa New Zealand aron makaabante gihapon sa sunod nga round. Kung dili makadaog ang Switzerland, matagak na ang Filipinas.