Human mikumpleto og 8-0 sweep UC Webmasters naglaraw og Luna sa CESAFI Finals USJ-R Baby Jaguars mao sab ang tirada

CEBU, Philippines — Walay pahuway nga mahitabo alang sa University of Cebu (UC) Webmasters human sila mikumpleto og makasaysayanong 8-0 sweep sa eliminasyon.

Duha ka gabii pa ang milabay sukad sila miangkon sa No.1 spot ug twice-to-beat advantage sa Final Four, ang Webmasters mobalik dayon sa korte alang sa mas importanteng misyon nga mao ang pagkulat og ticket sa kampiyonato.

Mao kini ang buot makab-ot sa mga batos ni coach Kernn Sesante sa dihang ilang sangkaon ang fourth-ranked University of San Jose-Recoletos (USJ-R) Jaguars sa collegiate division semifinals sa Cebu Schools Athletic Foundation, Inc. (CESAFI) Season 24 men's basketball tournament karong adlawa (Huybes, Nobiembre 28) diha sa Cebu Coliseum.

Magbangga ang duha ka puwersa sa alas 6:45 sa gabii.

Ubos sa pagpangu nilang Jepherson Nonol ug Zareygel Rosano nga nagkumboya'g 21 puntos, ang Webmasters mibuntog sa Benedicto College (BC) Cheetahs, 53-44, naidtong Martes sa gabii aron birahon ang numero unong puwesto nga naghatag kanila og twice-to-beat nga insentibo batok sa Jaguars.

Sa tinguha nga usbon ang 76-58 nilang demolisyon sa Jaguars niadtong Oktubre 6, ang Webmasters naglantaw sa mas dako nga premyo nga mao  ang pagsud sa Finals sa ikatulong sagunson nga higayon.

Sa high school category, ang top seeded USJ-R Baby Jaguars naglaraw nga moangkon og luna sa finals sa dihang ilang harongon ang UC Baby Webmasters sa pasiunang duwa nga gikatakda sa alas 5:15 sa hapon.

Luyo sa impresibong double-double ni Carlo Salgarino nga mipupo og 19 puntos ug 14 ka rebounds, ang Baby Webmasters nakaipsot sa Cebu Eastern College (CEC) Dragons, 57-55, sa tinagakay nilang duwa aron labnihon ang ikaupat ug katapusang lingkoranan sa semis.