Cone kuntento na sa Gilas lineup
CEBU, Philippines — Gusto ni Gilas Pilipinas head coach Tim Cone nga ipabilin ang kasamtangang 15 ka players sa iyang training pool sa national team apan miangkon nga tanan iya pang timbang-timbangon sa ilang paglakaw sa unahan. Ang Gilas midaog sa ilang mga sangka batok sa New Zealand ug Hong Kong sa 2nd window sa 2025 FIBA Asia Cup qualifiers nga nakahatag kanila og luna sa FIBA Asia Cup sunod tuig didto sa Jeddah, Saudi Arabia.
Sa qualifiers, ang Pilipinas mipaduwa og 12 ka players gikan sa ilang 15-man pool,nga naglangkob og duha ka naturalized players nga sila si Justin Brownlee ug Ange Kouame ingon man sila si AJ Edu ug Jamie Malonzo nga parehong dunay gihambin nga injury.
Human sa 93-54 nilang demolisyon sa Hong Kong niadtong Domingo, si Cone nagkanayon nga dili na niya dungagan pa ang ilang linyada.
“I think the more you increase the pool, the more teaching you have to do and you have to keep the — if you can keep a core going all the time and really focus on that core, keep it a tight group, then that core is going to get better,” pasabot pa ni Cone.
Ang Gilas gikatakda nga mokumbati sa sunod nga window sa qualifiers unya sa Pebrero 2025 diin ila na sab nga makaharong ang New Zealand ug ang Chinese Taipei.
- Latest
