Nanginit nga Celtics mikastigo sa Clippers

CEBU, Philippines — Si Jayson Tatum mikadlit og 20 puntos ug ang Boston Celtics mibomba og 22 ka 3-pointers aron ilampaso ang Los Angeles Clippers, 126-94, sa NBA kagahapon didto sa TD Garden sa Boston, Massachusetts.

Midugang si Payton Pritchard og 20 puntos alang sa Celtics, nga miinat sa sagunson nilang daog ngadto sa unom ka duwa.

Nagparamdam sab dayon si Kristaps Porzingis sa iyang season debut uban ang 16 puntos, unom ka rebounds ug duha ka blocks ang Celtics. Mao pa kadto ang iyang pagbalik sa korte sukad naoperahan ang nayayay niyang tiil. Si Ivica Zubac mikolekta og 23 puntos ug 10 ka rebounds samtang si James Harden mipupo og 19 puntos, siyam ka assists ug walo ka rebounds apan wala mosaler ang impresibo nilang salida kay naputol man ang lima ka sunod-sunod nga daog sa Clippers.

Sama ni Porzingis, si Ja Morant nagmadaogon sab sa iyang pagbalik human gipangulohan ang Memphis Grizzlies ngadto sa 123-98 nga pagpatikangkang sa Portland Trail Blazers

Si Morant mibubo og 20 sa iyang 22 puntos sa first half ug midugang og 11 ka assists samtang Jaren Jackson Jr. adunay 21 puntos alang sa Grizzlies.

Si Morant nakapalta og walo ka duwa kay nayayay ang hawak human natagak atol sa ilang duwa batok sa  Los Angeles Lakers niadtong Nobiyembre 6.

Didto sa Atlanta, si Kyrie Irving miharos og 32 puntos, pito ka rebounds ug unom ka assists sa dihang gipasukarap sa Dallas Mavericks ang Hawks, 129-119, bisan og wala ang bitoon nilang si Luka Doncic sa ikatulong sunod-sunod nga higayon kay na-angol ang kamot.

Si Jaden Hardy midugang og 23 puntos alang sa Mavs, nga midaog sa ikalimang higayon sa miagi nilang unom ka duwa. Sila si Naji Marshall ug Spencer Dinwiddie dako sab og naambag sa Mavs bitbit ang 22 puntos matag usa.

Si Jalen Johnson mihipos og 28 puntos ug 10 ka rebounds samtang si Trae Young mitali og 18 puntos ug 16 ka assists alang sa Hawks, nga kaupat na nahagsa sa miagi nilang lima ka duwa.