Celtics nakaipsot sa Wizards

CEBU, Philippines — Si Jaylen Brown mipatuasik og 31 puntos ug 11 ka rebounds sa dihang ang defending champion Boston Celtics nakalingkawas sa Washington Wizards, 106-98, sa NBA kagahapon didto sa Capital One Arena sa Washington.

Nagkupot na karon og 13-8 nga baraha ang Celtics apan padayong nanglimbasog sa NBA Cup diin anaa sila sa ikaduhang puwesto sa Eastern Conference Group C sunod sa Atlanta Hawks bitbit ang 2-1 rekord.

Ang alas sa Celtics nga si Jayson Tatum nakamaneho og 16 puntos bisan og nasipyat sa tanan niyang 10 ka 3-pointers.

Sa laing bahin, si Andrew Wiggins mitagak og 30 puntos aron ituboy ang Golden State Warriors ngadto sa 112-108 nga pagpakaging sa New Orleans Orleans.

Ang Golden State miinat sa ilang marka ngadto sa 12-3 ning regular season apan abante na sa NBA Cup quarterfinals kay wala pay pilde sa tulo ka duwa.

Bisan og wala si Luka Doncic, ang Dallas Mavericks mipakita og igong katakos aron tumbahon ang Denver Nuggets, 123-120.

Sila si Naji Marshall ug P.J. Washington nagkumboya'g 48 puntos aron pangulohan ang Mavs.

Samtang si Giannis Antetokounmpo mirehistro sa ikaduha niyang triple-double sa upat ka duwa uban ang 37 puntos, 11 ka assists ug 10 ka rebounds sa dihang gipayaka sa Milwaukee Bucks ang Indiana Pacers, 129-117.

Si Damian Lillard miamot og 24 puntos ug 12 ka assists alang sa Bucks nga 2-0 na sa NBA Cup.

Didto sa Philadelphia, ang Sixers mipakgang sa lima ka sagunson nilang pilde human gipaksit ang Brooklyn Nets, 113-98. Si Jared McCain mi-iskor og 30 puntos samtang si Tyrese Maxey midugang og 26 puntos alang sa Sixers nga miduwa nga wala ang mga haligi nilang sila si Joel Embiid ug Paul George.