CRMC Mustangs mibaraw sa tinguha sa Wildcats Magis Eagles no.2 seed sa final four

CEBU, Philippines — Ang Cebu Roosevelt Memorial Colleges (CRMC) Mustangs mibaraw sa tinguha sa Cebu Institute of Technology-University (CIT-U) nga makasud sa Final Four human ilang gipiog ang Wildcats, 73-70, sa Cebu Schools Athletic Foundation, Inc. (CESAFI) Season 24 men's basketball tournament niadtong Martes sa gabii, Nobiyembre 19, didto sa Cebu Coliseum.

Si Redjhee Recimento misidlak nga labing hayag sa Mustangs ni coach Paul Alelu Flores human nakapasud og walo sa 10 niya ka itsa dayon na ngadto sa pagkadlit og 20 puntos.

Mihimo sab og kasikas si team captain Paulo Dalumpines uban ang 12 puntos, lima ka rebounds, unom ka assists ug unom ka steals aron tabangan ang Mustangs paglayat gikan sa ikawalo ngadto sa ikaunom nga dapit sa college division standings uban ang duha ka daog sa pito ka duwa.

Ang Wildcats duna pa untay tsansa nga makapuwersa og overtime apan si Jerian Marc Abello nasipyat sa libre kaayo niyang tres dayong kapupos sa oras.

Si Matthew Paras mihipos og 18 puntos, lima ka rebounds, tulo ka assists ug duha two steals, samtang si Abello mitimbre og 11 puntos, 12 ka rebounds, duha ka assists ug duha ka steals apan nakawang ang ilang paningkamot gumikan kay nahugno ang damgo sa Wildcats nga makataak sa semifinals sa labing unang higayon human natagak sa 2-5.

Sa high school level, si Jelomar Rota miharos og 28 puntos ug 16 ka rebounds, si Arturo Manuel Teruel mi-iskor og 16, samtang si Lars Fjellvang midugang og 11 puntos ug 10 ka rebounds sa dihang ang two-time defending champion Sacred Heart School-Ateneo de Cebu (SHS-AdC) Magis Eagles milampaso sa Don Bosco Technical College (DBTC)-Cebu Greywolves, 92-58, aron angkonon ang No.2 spot padung sa semifinals uban ang 9-1 nga baraha.

Nakahatag kini sa Magis Eagles og twice-to-beat advantage batok sa karibal nilang University of the Visayas (UV) Baby Lancers sa semis. — ( Banat News )