Cool Smashers ikakasa ang Semis

MANILA, Philippines — Huling naglaro ang nagdedepensang Creamline noong Hunyo 29 kasunod ang mahabang break.

Sa kanilang pagbabalik-aksyon ay pupuntiryahin ng Cool Smashers ang semifinals ticket laban sa PLDT Home Fibr High Speed Hitters ngayong alas-4 ng hapon sa 2023 Premier Volleyball League Invitational Conference sa Philsports Arena sa Pasig City.

Bitbit ng Creamline ang 2-0 record sa Pool A kasunod ang PLDT (1-0), Chery Tiggo (1-1), Gerflor (0-1) at Akari (0-2) habang nangunguna sa Pool B ang F2 Logistics (3-0) sa itaas ng Choco Mucho (2-1), Cignal HD (2-1), Petro Gazz (2-1), Foton (0-3) at Farm Fresh (0-3).

Sa kanilang huling laban ay pinabagsak ng Cool Smashers ang Defenders, 25-18, 25-11, 25-12, para sa pangalawang dikit na panalo at lumapit sa semis berth.

Sina Alyssa Valdez, Tots Carlos, Michele Gumabao, Jema Galanza, Bernadeth Pons at Risa Sato ang mu­ling aasahan ng Creamline katapat sina Kath Arado, Rhea Dimaculangan, Fiola Ceballos, Michelle Morente at Jovielyn Prado ng PLDT.

Galing ang High Speed Hitters sa 25-15, 25-19, 25-22 pagdaig sa Chargers noong Hulyo 1 at hangad ang pangalawang dikit na panalo sa Cool Smashers.

Sa alas-9:30 ng umaga maghaharap ang Chery Tiggo at Gerflor kasunod ang banggaan ng F2 at Petro Gazz sa alas-12 ng tanghali habang sa alas-6:30 ng gabi magkikita ang Cignal at Farm Fresh.

Ipopormalisa ng Cargo Movers ang pagbulsa sa semis ticket sa pagsagupa sa Gazz Angels.

Itinakas ng F2 ang 21-25, 25-17, 17-25, 25-21, 18-16 panalo sa Choco Mucho (2-1) noong Martes sa likod ng 24 points ni Kianna Dy.

Nanggaling din sa tagumpay ang Gazz Angels matapos gibain ang Foxies, 25-18, 22-25, 25-19, 19-25, 15-7, tampok ang 16 points ni Grethcel Soltones at 15 markers ni Aiza Pontillas.