Ginebra sasamahan ang TNT sa EASL
MANILA, Philippines — Muling sasalang ang TNT Tropang Giga sa East Asia Super League (EASL) kasama ang Barangay Ginebra sa Oktubre 11.
Magagawa na ng EASL ang kanilang home-and-away tournament matapos magdaos ng isang eight-team preseason competition tampok ang paglalaro ng TNT, San Miguel at mga koponan mula sa Korea, Taiwan at Greater China.
Walang naipanalo ang Tropang Giga at Beermen sa kanilang mga laro sa nasabing torneo na pinagharian ng Anyang KGC laban sa Seoul SK Knights.
Bumida sa tagumpay ng Anyang si dating Gilas Pilipinas player at Letran Knights star Rhenz Abando.
Makakasama ng TNT at Ginebra sa EASL tournament ang Anyang KGC, Seoul SK Knights ng Korea at ang Taiwan-based na Bay Area Dragons na naging guest team sa nakaraang PBA Commissioner’s Cup.
Ang huling tatlong puwesto ay ibibigay sa dalawang Japanese B-League finalists at sa Taipei P.League+ champion.
Idaraos ang EASL games tuwing Miyerkules kung saan sasalang ang bawat koponan sa tatlong home games at tatlong away games sa preliminaries.
Posibleng ibalik ng Tropang Giga si Best Import Rondae Hollis-Jefferson na bumandera sa kanilang paggupo sa Gin Kings at kay Justin Brownlee sa nakaraang PBA Governors’ Cup Finals.
- Latest