Magsayo makigbinukbokay kang Figuroa

Alang sa bakanteng interim WBC featherweight title

CEBU, Philippines — Magbinukbokay na ibabaw sa ring ang parehong mga hard-hitting world champions nga mao ang Bol-anong si Mark “Magnifico” Magsayo ug Mexican-American Brandon “The Heartbreaker” Figuroa alang sa bakanteng WBC interim featherweight title karong adlawa didto sa Toyota Arena sa Ontario, California.

Ang makadaog niini mao otomatikong mohagit sa kasamtangang WBC featherweight champion nga si Rey Vargas.

Nailog ni Vargas ang featherweight belt gikan kang Magsayo usa usa ka split-decision nga kadaogan sa miaging tuig didto sa Alamodome sa San Antonio.

Ang ilang sangka karon gi-promote sa Premier Boxing Champions ug live kini sa SHOWTIME ug ESPN. Ania ang kamada sa duha, si Figueroa nga mas taas og gamay sa height naghupot og 23-1-1, 18 KO’s rekord samtang si Magsayo 24-1, 16 KO’s.

Atol sa weigh in kagahapon, walay sami nga nitungtong sa 125 ¾ lbs. si Figuroa apan si Magsayo nilapas sa weight limit sa iyang 126¾ sumala pa sa report sa Philboxing.com. Gihatagan siya og duha ka oras aron magpaus-os sa iyang timbang. Human sa pagpasingot, walay gisuot nga subling nitungtong sa timbangan si Magsayo og kini nakakuha sa timbang nga 125¾ lbs. parehas sa gibug-aton sa iyang kaatbang. Gituohan nga nagpanikad na si Magsayo nga makasangka sa championship aron mabawi ang iyang bakus gikan kang Vargas human sa sikit kaayo nilang sangka sa dihang nailog gikan kaniya ang bakus. Samtang si Fiqueroa nga taga Texas, gikatahong maoy paborito sa mga betting sites 3-1 batok ni Magsayo kinsa hangtud karon dili pa sama ka ilado ni Fiqguroa diha sa US.—IBM