Centurion basketball tournament miarangkada na

CEBU, Philippines —  Ang Centurion Security Agency, Inc. Basketball Tournament 2025 malampusong misikad niadtong Domingo, Marso 23, didto sa Mandaue City Cultural and Sports Complex.

Si Centurion President ug General Manager Atty. Michelle Mendez-Palmares ug Vice President for Finance Ma. Jasmin Mendez-Pages maoy nangu sa pormal nga seremonyas sa pagbukas kauban sila si Cebu City Vice Mayor Dondon Hontiveros, Cebu City Sports Commissioner John Pages, Mandaue City Councilor Malcolm Sanchez ug Cebu 6th District congressional aspirant Atty. Regal Oliva.

Si Hontiveros, usa ka gi-idolong personalidad sa sports nga nahimong tig-alagad sa publiko, ang mipasiugda sa ceremonial toss, samtang ang Team Regal ni Oliva nakit-atbang sa Centurion All-Stars sa usa ka exhibition game.

Mitambong sab sa okasyon sila si Malu Mendez, ang kapikas ni anhing Atty. Jack Mendez nga maoy nagtukod sa Centurion niadtong 1965, ug sila si Atty. John Majed Ungab ug Atty. Mary Grace Hermosa Casano sa Integrated Bar of the Philippines (IBP)-Cebu City Chapter nga nagsilbeng mga judges sa pagpili sa best team uniform ug best muse.

Sa laing bahin, usa ka dosenang teams ang mopakita'g aksiyon ning tulo ka bulan nga torneyo, unom sa juniors ug unom sab sa seniors division.

Si Mendez-Palmares nagkanayon nga kining kalihukan sa paugnat sa kusog kabahin sa ilang selebrasyon sa ika-60 nga anibersaryo sa Centurion.