Sa sangat, San Fernando Young Achievers Sports Academy mo-arangkada na

CEBU, Philippines — Usa ka komprehensibong grassroots sports program ang mosikad karong adlawa didto sa Barangay Sangat, lungsod sa San Fernando, habagatang bahin sa Sugbo. Pagatawgon og Young Achievers Sports Academy, mo-arangkada kini uban ang usa ka basketball training camp didto sa Sangat gym sugod sa alas-8 sa buntag.

Ubos sa superbisyon sa United Basketball Referees Association (UBRA) VisMin Sports Events Management Services nga gipangulohan sa managing director niinig si Stephen Ababon, ang unang paglawig sa academy hugtanong gipaluyohan ni Riyadh Christopher V. Oacan, ang Sangguniang Kabataan chairman sa Sangat nga mao sab ang SK Federation president sa San Fernando.

"Kalabot kini sa atong programa sa SK nga makabaton og kalihokan nga adunay long term effects alang sa mga konstituwente nga atong giserbisyohan. Atoa i-train ang youth aron mamahimo pa silang mo-improve sa ilang hilig nga basketball," matud pa ni Oacan.

"Ang end goal gyud nato is to open opportunities for these youth to play for scholarships, or for local or national leagues. Dako nato kining garbo ug kalipay kon kini mahitabo kay usa kita sa mga instrumento nga nakahatag og kaayohan nila," padayon pa ni Oacan.

Ang kanhi PBA player nga si Denok Miranda, nga bag-ohay pang gitudlo nga head coach sa Far Eastern University (FEU) Tamaraws sa UAAP, ug coach Paul Alelu Flores, nga migiya sa Consolacion Sarok Weavers ngadto sa duha ka sagunson nga makasaysayanong kampiyonato sa Pilipinas Super League (PSL) sa miaging tuig, maoy mangunay pagpadagan sa clinic. Sila si Miranda ug Flores nakaduwa uban ni Arwind Santos sa FEU Tamaraws nga nakampiyon sa UAAP niadtong 2004.

"Ako, isip basketball enthusiast pud, nakita nato ang kamaayo sa play sa Consolacion Sarok Weavers sa ilang PSL stint, ug sa uban pa nilang liga nga gisalmotan. Knowing this, excited gyud kaayo ko nga dalhon kining klase sa pag-train nganhi sa Barangay Sangat from no other than coach Paul Flores himself," dason pa ni Oacan.

"Coach Denok (Miranda) was recommended to us by coach Paul considering nga nagkauban sila together during their college days as athletes and now, doing proficiently in their own teams, Sarok Weavers and FEU Tamaraws, respectively. Of course, we also know coach Denok as an ex-PBA player, which makes this all the more exciting kay makahatag gyud og daghang pagtulon-an para sa atong mga kabatan-onan," dugang pa ni Oacan.

Sa laing bahin, si Ababon nagkanayon nga human sa basketball, plano nila nga mopahigayon og susamang kalihukan alang sa volleyball ug boxing sa ilang academy nga ilang dad-on sa nagkadaiyang dapit sa Visayas ug Mindanao. "VisMin atong coverage mao nang nagpasalamat gyud ko og dako ni chairman Riyadh (Oacan) nga ang Sangat, San Fernando maoy nahimo namo nga starting point sa academy," padayag pa ni Ababon.