SHAABAA season 25 Xchange forex batch 2000 kampiyon sa division A
CEBU, Philippines — Gi-sweep sa Xchange Forex Batch 2000 ang Magis Medical Fund Batch 1997 sa ilang best-of-three finals series uban ang sikit nga 68-64 nga desisyon sa Game 2 aron paglugwa nga kampiyon sa Division A sa Sacred Heart Ateneo Alumni Basketball Athletic Association (SHAABAA) Season 25 niadtong Biyernes, Oktube 28, didto sa Magis Eagles Arena sa Barangay Canduman, dakbayan sa Mandaue.
Mao kadto ang ikatulong korona sa Batch 2000 sud sa lima ka tuig.
Si Johannes Chua misidlak nga labing hayag sa Batch 2000 human mipupo og 19 puntos, lima ka rebounds, duha ka assists ug tulo ka steals hinungdan nga siya maoy gibayaw nga Finals MVP.
Si Dave Michael Ting, nga sa sayo pa apil sa mga gipadidunggan isip usa sa 25 Greatest Players of All Time sa SHAABAA ug si Serg Al Gobui mihimo sab og kasikas sa Batch 2000.
Si Ting mikadlit og 16 puntos ug duha ka rebounds samtang si Gobui midonar og 14 puntos ug pito ka rebounds.
Si Roderick Mangubat mihipos og 17 puntos ug pito ka rebounds alang sa Batch 1997 samtang si Walter Ong mikimada og 15 puntos ug duha ka rebounds sa pilderong kawsa.
- Latest
