Toledo Trojans mipakgang sa malas
CEBU, Philippines — Ang Toledo City Trojans miputol sa lima ka sagunson nilang malas apan nag-agi usa sila og makuyaw kaayong dalan sa wala pa buntoga ang ilang mga karibal sa ikaduhang hugna sa Professional Chess Association of the Philippines (PCAP) Open Conference niadtong Sabado sa gabii. Gipangulohan nilang International Master Rico Mascarinas ug National Master Rommel Ganzon, ang Trojans napilde og usa ka lugas sa blitz, 3-4, apan mipatigbabaw batok sa Peng Cheng Checkered Dragons sa China sa rapid event, 8-6, aron pagposte niini og kulbahinam nga daog, 11-10.
Ang Trojans, nga gilangkoban sab nilang team captain Bonn Rainauld Tibod, Richard Natividad, Redentor Nailon, Rogelio Enriquez Jr. ug Jinky Catulay, mitaak pa og laing mapit-os nga dalan human niini. Ang Trojans ni co-team owner Atty. Jeah Jean Gacang ug team manager Felix Poloyapoy, Jr. nagtabla ug ang Davao Executives Chess Society, 10.5-10.5, apan ang Trojans maoy midaog sa kinauwahian pinaagi sa Armegeddon, 3-0. Gumikan niini, ang Trojans mikatkat sa ikawalong dapit sa Southern Division standings uban ang 2-5 win-loss record.
Sa laing bahin, ang Lapu-Lapu City Naki Warriors mikadlit na sab og duha ka sunod-sunod nga daog aron pagsawo niini sa ikaupat ngadto sa ikaunom nga puwesto uban ang SinQGApore ug Penang Blue Panthers sa Malaysia bitbit ang managsamang 4-3 nga baraha.
Ubos sa pagtimon nilang Saudi-based NM Elwin Retanal, Woman IM Bernadette Galas, Anthony Makinano, Linky Yap, Allan Pason, Bryle Arellano ug playing team manager Aldwin Daculan, ang Naki Warriors mipakaging sa Peng Cheng, 13-8, ug dayon milampornas sa Olongapo Rainbow Team 7, 12-9, alang sa ikaupat nilang sagunson nga daog.
- Latest
