Clippers buhi pa

CEBU, Philippines — Si Paul George mipaulbo og 41 puntos samtang si Reggie Jackson midugang og 23 puntos sa dihang gipabugnaw sa Los Angeles Clippers ang Phoenix Suns, 116-102, sa Game 5 aron pag-angkon og laing kinabuhi sa ilang best-of-seven NBA Western Conference Finals kagahapon didto sa The Valley sa Phoenix, Arizona.

Alkansi pa hinoon gihapon ang Clippers sa baraha nga 3-2 apan posible nilang tablahon ang serye kon ugaling usban og parot ang Suns sa Game 5 karong Huybes didto sa Staples Center sa Los Angeles, California.

Mangtas kaayo si George nga mibubo og 20 puntos sa ikatulong kuwarter. Mipasud siya og 15 sa 20 niya ka itsa ug mitapos uban ang 13 ka rebounds ug unom ka assists.

Wala sab magpabitin si Marcus Morris Sr. nga miamot og 22 puntos alang sa Clippers, nga milampos bisan og wala sila si Kawhi Leonard ug Ivica Zubac nga parehong dunay gihambin nga angol.

Ang Suns nakabawi unta human malubong og 15 puntos sa first half. Nakalabaw pa gani sila sa unang  higayon, 62-61, human sa tira ni Chris Paul apan ang Clippers miratsada og 10 ka sagunson nga puntos ug dayon mitusak-tusak sa ilang mga tres aron pagkontrola sa duwa sa hingpit uban ang 82-70 nga bentaha. Ang Suns nakasikit sa katapusang higayon sa iskor nga 94-98 sa pinal nga 6:58 sa aksiyon gumikan kay ang Clippers milusad og10-2 run aron pagsemento sa ilang daog.

Si Devin Booker maoy nangu sa Suns uban ang 31 puntos. Si Paul dunay 22 puntods samtang si Deandre Ayton mihipos og 10 puntos ug 11 ka rebounds sa pilderong kawsa.