Randle, Payton nangulo sa Knicks pagtastas sa Blazers

CEBU, Philippines — Parehong mipabuto og 22 puntos sila si Julius Randle ug Elfrid Payton alang sa New York Knicks nga mitipi sa nanulong nga Portland TrailBlazers, 110-99  duwa nila sa NBA kagahapon didto sa Madison Square Garden sa New York.

Si RJ Barrett mikadlit og 18 puntos alang sa Knicks nga mirehistro sa ilang ikaduhang sunod-sunod nga daog.

Ang TrailBlazers gipangulohan ni Damian Lillard  nga mibugha og 29 puntos ug mipasa og siyam ka assists.

Ang back-to-back 3-pointers ni Lillard paghuman sa first quarter naghatag sa TrailBlazers sa ilang kinadak-ang labaw nga 31-26.

Upat ka higayon nagtabla ang iskor sa second period sa wala pa kini masiak pinaagi sa lay-up ni Payton nga mipaabante sa Knicks, 51-49.

Nagtabla sa ikalimang higayon human si Lillard mipasud sa iyang usa ka jumper, 51-all, apan sila si Barrett ug Payton mipasud og back-to-back 3-pointers aron tapuson ang first half sa iskor nga 57-51 pabor sa Knicks.

Giablihan nilang Barrett ug Payton ang third period pinaagi sa sunod-sunod nga basket aron bingaton ang labaw sa Knicks ngadto sa 10 puntos.

Didto sa Philadelphia, ang agresibong Philadelphia 76ers miwataswatas sa nagkagidlay nga Brooklyn Nets aron molugit og 124-108 nga kadaogan didto sa Fargo Wells Center.

Mipatuasik og 33 puntos si Joel Embiid, samtang si Ben Simmons mitusak og 16 puntos, 12 ka rebounds ug walo ka assists aron mangulo sa opensa sa Philadelphia.

Si Tobias Harris miariya og 21 points ug 12 ka rebounds alang sa 76ers nga kasamtangang nag-una sa Eastern Conference standing bitbit ang 17-7 nga baraha.

Ang 76ers milansang sa ikalimang daog sa katapusan nilang unom ka duwa.

Si James Harden nga gibangko sa fourth quarter, miligwat og 26 puntos uban ang 10 ka assists ug walo ka rebounds aron mangu sa scoring sa Brooklyn, kinsa niduwa nga wala silang Kyrie Irving ug Kevin Durant.

Wala moduwa si Irving tungod sa lisa sa iyang tuong tudlo ug si Durant mawala sud sa usa ka semana agi'g pagsunod sa health and safety protocols sa liga.