Magtigum alang sa ting-uwan: Leksiyon nakat-onan ni 'Kumong Bato' Suico

CEBU, Philippines — Dili malalis nga si Randy "Kumong Bato" Suico nakakulit og pangan isip usa sa labing maayong boksidor nga nahulma sa Sugbo ug misulbong nga bitoon dili lamang dinhi sa nasud, apan hasta sab sa langyaw'ng  lapyahan.

Si Suico matawag nga "late bloomer" kay sa edad pa nga 14-anyos una siyang nakasul-ot og gloves sud sa hawanan sa Noy Pacing Flores Gym sa Barangay Alang-Alang Dakbayan sa Mandaue.

Sa dihang miaway na siya ubos sa poder sa ALA Gym, si Suico nahimong national champion sa makadaghan nga higayon ug gibayaw pa gani nga Best Boxer niadtong 1997 Philippine National Games (PNG) nga gipahigayon dinhi sa Dakbayan sa Sugbo.

Apil sa iyang mga kadungan niadtong panahona mao sila si Malcom 'Eagle Eye' Tunacao, Revero 'The Gentle Giant' Santillan, Rodel 'Batang Mandaue' Mayol, Eriberto 'Yukka' Gejon ug Dindo Castañares.

Sa dihang si Suico nahimong pro uban nilang Tuñacao ug Santillan niadtong 1998, gibunyagan sila isip  "Golden Boys of Cebu Boxing".

Maayo kaayo ang pagkakupot nila sa ilang papel.

Si Tuñacao misakmit og world title (WBC flyweight), samtang si Santillan naghari isip OPBF welterweight champion sa makadaghan nga higayon.

Si Suico ubos sa pagduma sa Hapon niyang manedyer nga si Joe Koizumi nahimong usa ka  two-division OPBF champion (super featherweight ug lightweight). Miaway siya alang sa WBA lightweight belt, apan napakyas human gitumba sa ikasiyam nga hugna sa wa'y pildeng si Juan Diaz sa Houston, Texas niadtong Hulyo 15, 2006 didto sa MGM Grand sa Las Vegas, Nevada.

Human siya miretiro niadtong 2017 bitbit ang record nga 31 ka daog, 26 niini pinaagi sa knockout, uban ang 10 ka pilde ug usa ka tabla, si Suico nagtrabaho isip fitness trainer.

Apan sama sa uban, ang 40-anyos nga si Suico nawad-an og kapanginabuhian tungod ning kalibutanong krisis panglawas. Pinaagi niini, nakat-on siya og leksiyon sa kinabuhi nga iyang gihinuklogan.

"Ang akong leksiyon karon na pandemiya kay need gyud ta mag-save og money para if unsay mahitabo, naa tay makuot pareho karon na kalit kaayo ang panghitabo, daghan ang naapektohan ug walay trabaho," matud pa ni Suico. "Tambag nako is mosunod lang gyud ta sa mga protocols  kay lisud na masakit og Covid. Stay at home lang gyud ta, dili mogawas og dli importante. Keep safe and always pray to God nga mahuman na ning tanan."