Pamilyang nalos mitatak og pangan sa basketbol

CEBU, Philippines — Ang managsuong Joseph Airo Jr., Joseph Arth, Joseph Aron ug Joseph Ace pulos mikulit og pangan sa natad sa basketbol.

Wa'y lalis nga nakuha nila ang ilang abilidad ug talento gikan sa ilang amahan nga si Joseph Airo Sr. nga mihimo og marka isip usa sa labing hait nga point guards sa Sugbo atol sa iyang panahon.

Si Joseph Sr. miduwa uban sa University of San Jose-Recoletos (USJ-R) Baby Jaguars sa Cebu Amateur Athletic Association nga mao na karon ang CESAFI, niadtong 1987-1990 ug dayon sa Cebu Polytechnic College (CPC) Hawks niadtong 1994-1997 diin siya regular nga nahimong sakop sa CAAA All-Stars.

Si Joseph Sr. napakita sab og aksiyon sa mga commercial teams nga El Rancho ug CPC-Fast Cargo sa Cebu Basketball League (CBL) sa hinapos nga bahin sa dekada 90.

Pipila ka tuig na ang milabay, pabilin nga mitagring ang pangan nga Joseph Nalos gumikan sa upat niya ka mga anak nga dili lamang niya pareho og pangan, apan repleksiyon sab sa iyang kahanas sa korte. Si Joseph Jr. usa sa pipila lamang ka players sa Cebu Schools Athletic Foundation, Inc. (CESAFI) nga nakadaog og kampiyonato sa high school ug college sa managlahing tunghaan. Iya kining nakab-ot uban sa Cebu Institute of Technology-University (CIT-U) Baby Wildcats niadtong 2009 ug dayon sa Southwestern University (SWU)-Phinma Cobras niadtong 2012.

Human sa duha ka tuig niyang salida sa Adamson University Falcons sa UAAP, si Joseph Jr. miduwa sa Mindanao Aguilas ug Zarks Burger sa PBA D-League. Mitapon dayon siya sa Maharlika Pilipinas Basketball League (MPBL) uban sa Caloocan Supremos, Zamboanga Family's Brand Sardines, ug Bataan Risers.  Ang mga manghod ni Nalos hinay-hinay sab nga mitatak sa ilang pangan. Si Joseph Arth kasamtangang sakop sa University of Cebu Lapu-Lapu and Mandaue (UCLM) high school varsity ug usa ka CESAFI All-Star guard, si Joseph Aron nakaduwa sa CIT-U sa CESAFI Partner's Cup ug sakop sa Talisay City Aquastars champion team sa Gullas Cup, samtang si Joseph Ace mikisaw sa Cebu City Olympics ug milugwa nga MVP sa Metro Cebu Basketball League (MCBL) Season 1.

Matud pa ni Joseph Jr. nga nahunong man tuod sa pandemiya ang mga kalihukan sa paugnat sa kusog sa nasud, apan tungod niini nalig-on og samot ang ilang pamilya pinaagi sa basketbol.

Midugang si Nalos nga halos kada adlaw magbasketbol sila sa hinimo nilang korte sa gamay nilang yuta didto sa Dumanjug. Samtang sila naglingaw-lingaw, iya kining gihimo nga higayon aron tudloan ang iyang mga igsuon og leksiyon sud ug gawas sa korte.

"Ako lang sila gitagaan og mga idea sa akong mga na-experience as a basketball player kay para makatabang sab nila in the future. And gi-push gyud nako sila nga maningkamot ug tagaan og oras and commitment ilang gibuhat kay kausa ra baya ta ma-basketball player. Maong ipakita nako nila nga suporta kaayo ko nila para ganahan sad sila," dason pa ni Joseph Jr.

Sa ilang mga nakab-ot ug sa mga butang nga kab-utonon pa nila sa umaabot, wa'y laing labing mapasigarbuhon kondili ang ilang amahan. "Dako kaayo ko'g pasalamat nga gi-balance nila ang eskwela ug ang basketbol kay dili lifetime ang basketball. Ang importante naa kay degree nahuman, labi na sa akong kinamaguwangan nga anak nga si Joseph Airo Nalos Jr. Hinaut nga mahatagan pa siya og maayo nga career sa iyang basketbol kay dako kaayo siya natabang sa amo pamilya ug sa iya mga igsuon," sumala pa ni Joseph Sr.