Plania gidayeg sa iyang kontra

CEBU, Philippines — Napilde man tuod si WBO No.1 bantamweight contender Joshua 'Don't Blink' Greer Jr. sa mga kamot ni 'Magic' Mike Plania, apan iya kining gidawat nga wa'y sakit sa buot uban ang tumang pagdayeg sa Pinoy'ng boksidor.

Si Greer inilog kaayo sa away ubos sa promosyon sa Top Rank niadtong Miyerkules didto sa MGM Grand sa Las Vegas, apan gitay-og ni Plania ang kalibotan sa boksing human iyang gitumba si Greer duha ka higayon dayon na ngadto sa pagkulit og daog pinaagi sa majority decision.

Miangkon si Greer nga nasurprisa gyud siya og maayo sa gipakitang kadasig ug abilidad sa 26-anyos nga garbo sa General Santos City nga miaway ubos sa Sanman Promotions.

Matud pa ni Greer nga wa'y lalis nga si Plania maoy mas labing maayong boksidor niadtong higayona ug gumikan niini nakuha ni Plania ang iyang pagtahod ug respeto.

“I’m gonna make a push again, you know. It was just Mike Plania’s night. He’s done a great job… I take my hat off to him,” matud pa ni Greer.

Midugang si Greer nga wala siya'y irason sa iyang kapildihan gumikan kay klaro man kaayo nga si Plania maoy maayo ug miduwa nga mas marunong.

“There’s no excuses from me. Mike Plania was just the better man. He was the smarter man in the end," sumala pa ni Greer.