Arana nagselebrar sa iyang birthday sa lahi nga pamaagi

CEBU, Philippines — Lahi ang pamaagi ni Rain or Shine guard Ryan Arana pagselebrar sa adlaw niyang natawhan.

Imbes nga mag-party sa ika-37 nga sumad sa adlaw niyang natawhan niadtong  Lunes, Mayo 23, si Arana mipaambit sa iyang grasya pinaagi sa pagpanghatag og pagkaon ngadto sa mga Pinoy frontliners ning panahon nga ang nasud gipaubos sa enhanced community quarantine gumikan sa coronavirus pandemic.

Sa iyang social media post, makita si Arana nga nanghatag og mga sandwich, pansit ug mainom sa mga polis, opisyal sa barangay, security guards, traffic enforcers ug mga libod suroy agi'g padayag sa iyang pasalamat kanila ning panahon sa kalibotanhong krisis.

Mismo si Arana ang mitabang pagpreparar sa mga pagkaon nga iyang gihatag sa mga tawo nga iyang gihulagway nga mga bayani sa kadalanan.

"It was a simple act yet seeing their big smiles made it fulfilling,"  matud pa ni Arana segun sa iyang post sa Instagram ug Facebook nga gitaho sa PBA.ph.

"I hope we can spread kindness and positivity especially at a time like this. Special thanks to all the people here at home who helped me with all the preparations. Cheers everyone," dugang pa niya.