Lady Eagles puro na sa semis
Laro sa Sabado(Smart Araneta Coliseum)
8 a.m. ADU vs UST (M)
10 a.m. ADMU vs UP (M)
2 p.m. UST vs UE (W)
4 p.m. UP vs FEU (W)
MANILA, Philippines — Pinalawak ng solo leader Ateneo ang winning streak sa siyam matapos muling pataubin ang Far Eastern University sa straight-sets lamang, 25-21, 25-10, 25-18 kahapon para lumapit sa Final Four sa Season 81 UAAP Volleyball Tournament sa FilOil Flying V Center sa San Juan City.
Humataw ang setter na si Deanna Wong ng 30 excellent sets at apat na puntos para sa Lady Eagles na pinadapa ang Lady Tamaraws sa ikalawang pagkakataon sa season na ito makaraan ang 3-2 panalo sa first round ng elimination noong Pebrero 24.
Hangad ng tropa ni coach Oliver Almadro na makakuha ng playoff sa huling Final Four berth sa pagharap sa NU Lady Bulldogs sa Linggo.
Sa kanilang matikas na performance, tinapos ng Katipunan-based team ang laro sa mahigit 74 minuto lamang para umangat sa 9-1 win-loss kartada.
Nagawa ng Lady Tamaraws na dumikit sa opening set, ngunit agad umarangkada ang Lady Eagles ng 8-2 bentahe sa ikalawang set na lumobo sa 14-2 sa atake ni Bea De Leon.
Mula rito, nakuha na ng Ateneo ang kanilang rhythm at kompletong nakontrol ang ikalawang set na natapos sa mahigit 20 minuto lamang.
Sa iba pang laro, naka-eskapo ang University of the Philippines Lady Maroons laban sa University of the East Lady Warriors, 25-23, 20-25, 25-23, 24-26, 15-11 para makopo ang pang-anim na panalo at umangat sa three-way tie sa ikatlong puwesto kasama ang FEU Lady Tamaraws at UST Tigresses sa parehong 6-4 win-loss kartada.
Samantala, sa men’s division, sinorpresa ng Adamson Soaring Falcons ang FEU Tamaraws, 25-14, 22-25, 25-23, 16-25, 17-15 upang mapabuti sa 6-4 slate habang pinataob naman ng UST Growling Tigers ang UP Fighting Maroons, 25-17, 18-25, 25-20, 25-15.
- Latest
