Daniel Quizon, Roel Abelgas wagi sa 1st round
MANILA, Philippines — Pinatumba nina International Master Daniel Quizon at FIDE Master Roel Abelgas ang kanilang mga karibal sa pagsisimula ng 21st Dubai Open 2019 sa Dubai Chess and C Culture Club sa UAE noong Lunes ng gabi.
Tinalo ni Quizon si Jalghoum Karmel ng Palestine, samantalang dinaig naman ni Abelgas si K Durgesh ng India para simulan ang kani-kanilang kampanya.
Kasalukuyan pang nilalabanan ng 14-anyos na si Quizon, inangkin ang kanyang IM title nang maghari sa nakaraang 2018 East Asia Juniors Championship sa Korea, si 22nd seed Malaysian IM Yeoh Li Tian sa second round habang isinusulat ito.
Kasagupa naman ni Abelgas, ang assistant coach ng National team na kumuha ng limang gold medals noong 2018 Asian Para Games sa Indonesia at coach ng Perpetual Help team na kumopo sa una nilang NCAA junior chess title, si Indian N R Visakh.
Nakipag-draw naman sina IM Oliver Dimakiling at WIM Kylen Joy Mordido sa kanilang mga karibal.
- Latest
