De La Hoya, Matthysse moanhi sa Pilipinas

CEBU, Philippines — Kuyogan ni boxing legend Oscar de la Hoya ang boksidor niyang si WBA welterweight champion Lucas ‘The Machine’ Matthysse sa pagbisita sa Manila karong Abril 18-19 alang sa usa ka press conference aron pormal nga ipahibalo ang pagdepensa ni Mathysse sa iyang bakus batok ni Manny Pacquiao karong Hulyo 15 didto sa 16,000-seater Axiata Arena sa Kuala Lumpur, Malaysia.

Mao kini ang labing unang away ni Pacquiao sukad siya gilangkatan sa iyang korona isip WBO welterweight champion ni Jeff Horn pinaagi sa  controversial split decision niadtong Hulyo sa miaging tuig didto sa Brisbane, Australia.

Si Matthysse misakmit sa  bakanteng WBA title human gipalukapa si Thai Teerachai Kratingdaeng Gym sa ikawalong hugna niadto lang Enero didto sa The Forum sa Inglewood, California.

Segun sa taho ni Joaquin Henson sa philboxing.com nga gawas ni Pacquiao, lain pang lima ka mga Pinoy ang mopakita’g aksiyon sa maong promosyon nga giulohan og “Fight of Champions.” 

Apil na niini ang Sugboanong si Jhack Tepora nga makigharong batok sa usa ka Mehikanong kaatbang alang sa bakanteng IBO featherweight title.

Gawas sa Malaysia, Pilipinas ug Argentina,  mopakita sab sa ilang abilidad sa maong fight card mao ang mga boksidor gikan sa Venezuela, South Africa, Thailand, Indonesia, Japan ug China.

Mao kini ang labing dakong boxing event sa Kuala Lumpur sukad si Muhammad Ali nakigbugno ni Joe Bugner didto sa Merdeka Stadium niadtong 1975.