Pulis nga boksidor sab titulo sa WBF ang tirada
CEBU, Philippines — Ang Sugbuanong boksidor nga usab sab ka pulis mosagubang sa labing lisud nga hagit sa iyang karera sa main event sa "Bakbakan Tres" double championship fight card sa Big Yellow Promotions karong Hulyo 23 didto sa Barba Sports Complex sa dakbayan sa Toledo.
Si Jusue "Pistolero" Bastillada, nga kasamtangang nadestino sa Toledo City Police Office, makigsinukmagay ni kanhi WBA Asia bantamweight champion Jess Rhey "Wanman" Waminal alang sa bakanting World Boxing Foundation (WBF) Silver featherweight title.
Ang 35-anyos nga si Bastillada misakmit sa Visayas Professional Boxing Association (VISPROBA) featherweright belt human gipatikangkang niya si Jason Tinampay sud lamang sa usa ka hugna sa miagi niyang away niadtong Abril 11. Si Bastillada nagkupot og 10-1 nga baraha uban ang 6KOs ug nakasagunson og pito ka daog sukad nakatilaw sa una ug bugtong niyang pilde pinaagi sa 5th round TKO batok ni Reycar "The Machine" Auxilio tulo ka tuig na ang milabay.
Mosakbang siya batok sa beteranong si Waminal, nga kanhi naghari sa WBA Asia bantamweight division human gipakamang ang Koreanong si Jin Wook Lim sa ikasiyam nga hugna niadtong 2018.
Apan ang taga-Bukidnon nga si Waminal naparot sa katapusan niyang upat ka away nga nakapahagsa sa iyang rekord ngadto sa 16-12-1 uban ang 9KOs.
Sa supporting main event, ang way pilde stablemate ni Bastillada nga si Arlando "The Punisher" Senoc Jr. (5-0, 4KOs) gikan sa Padre Burgos sa Southern Leyte makigharong batok ni Eugene Noynay (6-1, 1KO) sa Bogo City alang sa bakanting VISPROBA flyweight title.
- Latest
