Thunder gikoronahan nga kampiyon sa NBA

CEBU, Philippines — Gituldokan sa Oklahoma City Thunder ang makapasilaw nilang season uban ang korona sa NBA human nila gipatikangkang ang Indiana Pacers, 103-91, sa Game 7 sa NBA Finals kagahapong adlawa didto sa Paycom Center sa OKC.

Ang Thunder, nga maoy nangu sa liga uban ang 68 ka daog sa regular season, milangkat sa una nilang titulo sukad sa kontrobersiyal nga pagbalhin sa ilang team sa OKC niadtong 2008. Nakatilaw na ang ilang prangkisa og kampiyonato niadtong 1979 sa dihang ginganlan pa sila og Seattle SuperSonics. Si Shai Gilgeous-Alexander mikadlit og 29 puntos ug 12 ka assists alang sa Thunder, kansang hugot nga depensa nakaapekto sa Pacers nga nahugno nang daan human naangol ang alas nilang si Tyrese Haliburton sa nakaaon nga siyete minutos pa lamang sa tinagakay nga duwa.

Igo lang nakasikit ang Pacers ngadto sa usa ka lugas, 47-48, sa halftime, gumikan kay ang Thunder mitagak og makabungog nga bomba, 34-20, sa ikatulong kuwarter ug sa usa ka higayon miabante og 22 puntos sa katapusang kuwarter.

"It doesn't feel real, so many hours, so many moments, so many emotions, so many nights of disbelief," matud pa ni Gilgeous-Alexander.  "It's crazy to know that we're all here. But this group worked for it, this group put in the hours and we deserved this."

Si Gilgeous-Alexander milinya sa iyang kaugalingon uban sa labing bangiitan nga players sa kasaysayan sa NBA human niya giharos ang scoring title, season MVP,  Finals MVP ug ang korona sa NBA sa susamang season.

Ang 26-anyos nga Canadian star guard nahimong labing unang player sukad ni LeBron James niadtong 2012-2013 nga nakdaog sa NBA regular season MVP ug Finals MVP sa susamang season.

Si Jalen Williams mibubo og 15 sa iyang 20 puntos sa second half samtang si Chet Holmgren midugang og 18 puntos, walo ka rebounds, usa ka steal, ug lima sa walo ka blocks sa Thunder. Si Haliburton mitali og nuybe puntos sa wala pa mayayay, butang nga nakapaluya sa Pacers.

"What happened with Tyrese, all of our hearts dropped," dason pa ni Pacers coach Rick Carlisle.

Si Bennedict Mathurin maoy nangu sa Indiana bitbit ang 24 puntos. Sila si Pascal Siakam ug T.J. McConnell mihipos og 16 puntos matag usa samtang si  Andrew Nembhard mi-iskor og 15 puntos alang sa Pacers, nga padayon gihapong naghandum og titulo sukad sila misud sa NBA niadtong 1976.