Alcoy mipakugang sa Samboan, Bogo milubong sa San Remigio

CEBU, Philippines - Gipakuratan sa Alcoy ang kanhi way pildeng Samboan, 68-57, sa Bracket S2 sa nagpadayong aksiyon sa 2017 Cebu Governor’s Cup Under-21 Inter-Cities/Municipalities Basketball Tournament niadtong Sabado sa gabii didto sa Boljoon municipal gym.

Nindot ang gipakitang sinugdanan sa Samboan hinungdan nga nakalabaw dayon sila og sayes puntos, 19-13, gumikan sa maanindot nga salida ni Yojildridge Luague.

Apan ang Alcoy hinay-hinay nga mibangon hangtud nga sila nakatabla, 46-46. Misamot pa ang kainit sa Alcoy sa katapusan kuwarter diin sila milusad og 22-11 run aron pagpayaka sa Samboan.

Sila si Renly de Leon, RR de los Santos ug Rodmark Gemotog mitali og 12 puntos matag usa sa labing unang daog sa Alcoy.

Napiangan hinoon ang Samboan nga miduwa nga wala nang duha ka sinaligan nilang sila si Joshua Balankig ug Louie Jay Señagan. Sila si Luage ug Eves Niño Manolong mihipos og 12 puntos matag usa apan dili kini igo sa Samboan nga nakatilaw sa labing una niining pilde sud sa tulo ka duwa.

Gumikan sa kaparotan sa Samboan, ang Dalaguete ug Boljoon mao na karon ang nagsawo sa liderato sa S2 bitbit ang managsamang 2-0 nga baraha. Ang Dalaguete nakaeskapo batok sa Oslob, 66-63, samtang ang Boljoon milampaso sa Santander, 82-69.

Sa Bracket N3 nga giduwa didto sa Bantayan municipal gym sa isla sa Bantayan, ang Bogo City way kaluoy nga mikulata sa San Remigio, 92-53, alang sa ikaduha niining sagunson nga daog.

Si Justine Valenzuela mibubo sa tanan niyang 20 puntos sa ikaduha ug ikatulong kuwarter nga maoy nakahatag sa Bogo og dakong labaw, 75-40, sa nahibiling 12 ka minutos sa duwa. Nagpadayon ang ilang kainit dayon na ngadto sa paglubong sa San Remigio og 39 puntos human sa duwa.

Sa laing mga aksiyon, ang Bantayan nakabawi pinaagi sa pagmakmak sa Medellin, 82-70, samtang ang Sta. Fe nakigsawo karon sa liderato sa N3 uban sa Bogo human gipukan ang Madridejos, 81-75. (EBV) (BANAT NEWS)