Tapdasan moreperi sa away ni Tepora

CEBU, Philippines - Ang World Boxing Organization mitudlo ni Danrex Tapdasan isip reperi sa title defense ni Jhack Tepora sa iyang WBO Oriental junior featherweight title karong Sabado diha sa Waterfront Cebu City Hotel and Casino.

Si Tepora (19-0, 14KOs) makigtakus ni Indonesian Yon Amed (14-7) sa main event sa Who’s Next? 4 Pro Boxing Series nga gipasiugdahan sa Omega Sports.

Si Tapdasan nga usa sab ka abogado, beterano sa 419 ka bouts. Siya sab maoy nagpatunga sa dihang gilangkat ni Rex Tso ang WBO international super flyweight title human gipilde ang Hapon nga si Hirofumi Mukai niadtong Marso 11 didto sa Hong Kong.

Sa edad nga 38-anyos, si Tapdasan maoy usa sa labing banggiitan nga reperi sa boksing sa nasud. Gani gipasidunggan na siyang Best Referee sa Elorde Awards.

Gawas ni Tapdasan, ang WBO mihingan sab nilang Salven Lagumbay, Edgar Olalo ug Edward Ligas isip mga hurado sa maong away. Samtang ang Sugbuanong reperi nga si Tony Pesons maoy moreperi sa WBO Oriental junior flyweight title bout tali nilang Christian Araneta ug Demsi Manufoe. (BANAT NEWS)