Shai nangu sa Thunder batok Cavs

CEBU, Philippines — Si Shai Gilgeous-Alexander mipaulbo og 43 puntos sa dihang gipakgang sa Oklahoma City Thunder ang duha ka

sunod-sunod nilang pildi uban ang 117-112 nga kadaogan batok sa Cleveland Cavaliers sa 2026-27 NBA season kagahapong adlawa didto sa Rocket Arena sa Cleveland, Ohio.

Ang Thunder miduwa nga wala ang tulo nila ka starters nga sila si Chet Holmgren, Jalen Williams ug Cason Wallace.

Apan nakamaneho gihapon sila pagtumba sa Cavs, salamat sa pagmangtas ni Shai.

Hait kaayo ang two-time reigning MVP nga mipasud og 14 sa 35 niya ka itsa ug mipasa og walo ka assists.

Misalida sab si Ajay Mitchell uban ang 20 puntos ingon man si Kenrich Williams nga mihipos og 12 puntos.

Sa laing bahin, ang katapusang way pildi nga team ning season nga Memphis Grizzlies nahagba sa mga kamot sa New Orleans Pelicans, 1354-134.

Samtang ang Philadelphia 76ers ug ang Houston Rockets parehong miinat sa ilang rekord ngadto sa 7-1.

Si Tyrese Maxey mi-iskor og 26 samtang si Jaylen Brown midugang og 25 puntos sa dihang giihaw sa Sixers ang Chicago Bulls, 126-107.

Si V.J. Edgecombe mitimbre og 21 puntos samtang sila si LeBron James ug Joel Embiid mikadlit og 15 puntos matah usa aron giyahan ang Sixers sa ikaupat nilang sagunson nga daog.

Didto sa Houston, si Alperen Sengun mibirada og 26 puntos samtang sila si Jabari Smith Jr. ug Amen Thompson parehong milansang og 14 puntos sa dihang gibugha sa Rockets ang Boston Celtics, 109-93.

Ang San Antonio Spurs nagkupot na karon og 5-2 nga baraha human gipaluhod ang Utah Jazz, 119-97.

Ang defending champion New York Knicks mipakaging sa silingan nilang Brooklyn Nets, 103-90, alang sa ikatulo nilang daog sa pito ka duwa.

Si Landry Shamet maoy nangu sa Knicks uban ang 22 puntos samtang si Jalen Brunson miposa og upat ka 3-pointers sa iyang 19 puntos.

Mikuha sab og atensiyon si Cade Cunningham uban ang 33 puntos sa 124-91 nga paglampaso sa Detroit Pistons sa Charlotte Hornets.

Sa ubang mga resulta, ang Washington Wizards mibuntog sa Orlando Magic, 103-94, samtang ang Atlanta Hawks midagit sa Indiana Pacers, 108-104.