Jersey '0' ni Russell Westbrook iretiro sa OKC
CEBU, Philippines — Ang Oklahoma City Thunder pormal nga moretiro sa number "0" jersey ni star guard Russell Westbrook atol sa ilang home game batok sa New York Knicks sa Pebrero 7 sunod tuig.
Si Westbrook mianunsiyo sa iyang pagretiro niadtong Agosto human sa 18 ka NBA seasons diin siya nahimong all-time league leader sa triple doubles nga miabot og 209.
Ang 37-anyos nga All-Star guard nakaduwa og 11 ka seasons uban sa Thunder gikan sa 2008 ngadto sa 2019. Human niini, mipakita siya og aksiyon uban sa Houston Rockets, Washington Wizards, Los Angeles Clippers, Los Angeles Lakers, Denver Nuggets ug Sacramento Kings.
Si Westbrook midaog sa 2017 NBA Most Valuable Player award uban sa Thunder, nga iyang gipangulohan ngadto sa playoffs siyam ka higayon. Nakasud sila sa Western Conference finals upat ka higayon ug nakaabot sa 2012 NBA Finals diin sila gipildi sa Miami Heat.
Ang No.4 overall pick sa 2008 NBA Draft miretiro isip all-time leader sa OKC sa labing daghan nga duwa (821), puntos (18,859), rebounds (5,760), assists (6,897), steals (1,442), field goals nga nasud (6,626) ug minutos nga naduwa (28,329).
Niadtong 2016-17 season, si Westbrook mi-average og 31.6 puntos, 10.7 rebounds ug 10.4 assists matag duwa aron mamahimong ikaduha pa lamang nga player nga mi-average og triple double sa usa ka tibuok nga season.
Nakoronahan siyang NBA scoring champion duha ka higayon niadtong 2015 ug 2017, siyam ka higayon naapil sa NBA All-Star ug katulo nahimong season assists leader.
- Latest


















