Vargas nanghambog

CEBU, Philippines - Nanghambog si WBO welterweight champion Jessie Vargas nga misamot pa  kakusog  ang daan na niyang bangis nga kinumo paingon sa sangka niya ni Manny Pacquiao karong Domingo didto sa Las Vegas.

Atubangan sa mga tigbalita, si Vargas miingon nga daku og natabang ang iyang trainer nga si Dewey Cooper sa pagpakusog sa iyang kumo ug naghinam-hinam na siya aron iya kining gamiton batok sa Pinoy boxing star.

Sa katapusan niyang sangka niadtong Marso, si Vargas mipakatug ni Sadam Ali aron mailog ang WBO title.

Si Vargas mipasidaan ni Pacquiao nga angay  nga magmabinantayon  sa ila unya nga sangka aron dili kini madisgrasya.