Cheetahs mibihag na sab sa Mustangs

CEBU, Philippines — Giusban og parot sa Benedicto College Cheetahs ang karibal nilang Cebu Roosevelt Memorial Colleges (CRMC) Mustangs.

Ug ila kining gibuhat sa mas bangis nga paagi.

Gamit ang paspas nga sinugdanan ug balanseng opensiba, ang Cheetahs milampaso sa Mustangs, 90-68, atol sa pagsugod sa Cebu Schools Athletic Foundation, Inc. (CESAFI) Season 24 men's basketball tournament niadtong Sabado sa gabii, Septiembre 21, diha sa Cebu Coliseum.

Sa miaging tuig, ang Cheetahs nag-agi usa og malisud nga dalan sa wala pa makaipsot batok sa Mustangs.

Lahi na ang estorya ning higayona gumikan kay dominante na kaayo ang Cheetahs.

Lima ka batos sa Benedicto College ang mikadlit og double figures nga gipangulohan ni Nicole Jay Cabañero nga mipupo og 19 puntos ug 13 ka rebounds.

Sila si Junnil Bulan ug Serge Gabines parehong mi-iskor og 13 gawas nga nagkumboya sila og siyam ka rebounds, unom ka assists ug duha ka steals alang sa Cheetahs nicoach BJ Murillo, nga wala na molingi pa sukad misirit ngadto sa 54-31 nga labaw sa halftime.

Mangtas kaayo ang Cheetahs nga sa usa ka higayon mi-abante og 29 puntos, 88-59, sa hilimatyong segundos.

Si Albert Tolipas miamot og 12 puntos, siyam ka rebounds, duha ka assists ug duha ka steals alang sa Cheetahs samtang si Allen Angelo Alicando midugang og 10 puntos, duha ka rebounds, usa ka assist ug duha ka steals.

Si Earl Laniton maoy nangu sa Mustangs uban ang 18 puntos, lima ka rebounds, usa ka assist ug duha ka steals. Si Keaton Clyde Taburnal dunay 10 puntos ug walo ka rebounds sa pilderong kawsa.

Sa laing bahin, ang University of Cebu (UC) Baby Webmasters misugat sa bag-o nilang coach nga si Reggie Licanda uban ang masipang buto human ilang gikastigo ang Don Bosco Greywolves, 84-58.

Giablihan sa Baby Webmasters ang duwa pinaagi sa nagkayong 13-0 rally dayon na ngadto sa pagestbalisar og dakong labaw, 28-6, human sa unang kuwarter.

Si Jake Lordwin Yong miharos og 15 puntos, tulo ka rebounds, usa ka assist, duha ka steals ug usa ka block, samtang sila si Carlo Salgarino ug Marcuz Gilbuena nagkumbinar og 20 puntos ug 12 ka rebounds aron ituboy ang Baby Webmasters ngadto sa 26 puntos nga demolisyon sa Greywolves.