Beermen tuyong modaog

CEBU, Philippines - Paningkamuton sa San Miguel  Beermen nga modaog sa Game-3  aron malikayan  ang  delikadong 0-3 nga biya sa ilang ‘best-of-seven’ finals series sa PBA Philippine Cup.

Ang Beermen  moharong pag-usab batok sa karibal nilang Alaska Aces karong alas-7 sa gabii didto sa Lucena City.

 Ang San Miguel nga napilde sa  Game-1 sa iskor nga 91-100 niadtong  Domingo ug nausban kini sa Game-2,  80-83  niadtong Martes. Didto nakamata si Beermen coach Leo Austria nga kinahanglan na nila nga modoble sa ilang paningkamot sunod duwa aron dili sila matiwasan  sa Aces karong gabii.

Gitumbok sa San Miguel ang ilang 0-2 nga biya mao ang wala pagduwa ni reigning MVP JuneMar Fajardo, kinsa na-injured atol sa semifinals batok sa Rain or Shine Elasto Painters. Apan  si Austria daan na nga miingon nga dili niya pugson sa pagpaduwa ang Cebuano center nga si Fajardo kun dili pa hingpit ang recovery sa tuhod niini.

Hinuon ang 6-foot-9 nga si Fajardo namahayag nga andam siya moduwa  sa Game-4 karong Domingo.

Tungod niini, ang San Miguel seguradong madasig  karon nga mokuha  og daog aron usab matabla nila sa 2-2 ang serye sa Domingo.

Kun ila kining mabuhat, hayan nga mailog usab nila ang momentum sa serye paingon sa usa unya   ka ‘come-from-behind’ nga kalampusan sa serye.

Apan sa ilang bahin, ang Alaska wa’y laraw nga tugtan ang San Miguel sa ilang dautang plano. Gani si coach Alex Compton mibahad nga kuhaon ang daog karon aron mabutang sila sa komportableng sitwasyon diin magkinahanglan na lang sila og usa ka daog aron makuha ang Philippine Cup title.

Sa pagkawala ni Fajardo, nakahuygo sa opensa ang mga bigmen sa Aces sama nila ni Sonny Thoss, Erik Menk ug Vic Manuel, kinsa nag-una karong kandidato isip finals MVP tungod sa iyang nindot nga performance sa Game-1 ug Game-2.

Gawas sa mga bigmen sa Aces, anaa usab ang mga slashers ug shooters nga sila si Calvin Abueva, Cyrus Baguio ug JV Casio nga lakip sa mga suliran sa depensa sa Beermen. (BANAT PALARO)