Pacquiao-Bradley 3 apektado sa galit ng fans

MANILA, Philippines – Nabigo si Filipino world eight-division champion Manny Pacquiao na mapabagsak si Floyd Mayweather Jr. dahil sa shoulder injury nito, habang marami naman ang inantok sa istilo ng American world five-division titlist.

Sinabi kahapon ni Bob Arum ng Top Rank Promotions na ang pagkainis ng mga boxing fans sa naturang super fight ang lubhang makakaapekto sa ikatlong banggaan nina Pacquiao (57-6-2, 38 KOs) at world welterweight king Timothy Bradley Jr. (33-1-1, 13 KOs).

Kaya naman inamin ni Arum na mahihirapan siyang ibenta ang Pacquiao-Bradley III na itinakda sa Abril 9 sa MGM Grand sa Las Vegas, Nevada.

“Will we do the same numbers for the first two Bradley fights? Probably not. We’re going to try to come as close as we can, and hopefully exceed it, but I understand what we’re up against,” sabi ni Arum.

Sa kanilang unang laban noong Hunyo ng 2012 kung saan nanalo si Bradley mula sa kontrobersyal na split decision, kumita ito ng 890,000 pay-per-view buys.

Sa kanilang rematch ni Pacquiao noong Abril 2014 na naipanalo ni ‘Pacman’ ay 800,000 PPV buys lamang ang tumangkilik.

“I’ve run my numbers and I have done my math. I’m not out here with my head up my ass,” sabi ni Arum sa nagawa na niyang pagko-compute sa magiging PPV buys ng trilogy nina Pacquiao at Bradley.

Idinagdag ni Arum na mas malaki ang kikitain ng ikatlong laban nina Pacquiao at Bradley kesa sa dalawa pang kandidatong sina WBO light welterweight ruler Terence Crawford (27-0-0, 19 KOs) at Amir Khan (31-3-0, 19 KOs).

Ito ay base sa kanyang pakikipag-usap sa HBO at sa mga pay-per-view distributors.

Ang magiging ‘selling point’ ng PPV ay ang pag­hugot ni Bradley kay trainer Teddy Atlas bilang kapalit ni Joel Diaz na sinibak niya noong Setyembre.

Nagtambal sina Bradley at Atlas noong Nobyembre kung saan pinasuko ni Bradley si Brandon Rios sa ninth round.