‘Di na pakakawalan ng Lady Falcons
Laro Ngayon (Rizal Memorial Diamond)
9 a.m. UP vs Adamson
MANILA, Philippines – Asahan ang mas mainit na paglalaro mula sa Adamson Lady Falcons dahil pupuntiryahin ng koponan ang ikalimang sunod na titulo sa UAAP softball sa pagharap sa UP Lady Maroons ngayon sa Rizal Memorial Ballpark.
Sa ganap na alas-9 ng umaga magsisimula ang labanan at kung papalarin uli ang tropa ni coach Ana Santiago ay maiaangat nila sa 62-0 ang makasaysayang winning streak na nagsimula noon pang 2011
Lumapit ang Adamson sa isang panalo tungo sa kampeonato sa pamamagitan ng 6-0 panalo sa Lady Maroons noong Martes.
Nagbigay lamang ng two-hits at may 12 strikeouts si Annalie Benjamen habang ang Lady Falcons ay nagpakawala ng walong hits mula ikatlo hanggang ikalimang innings para makaiskor ng anim na runs.
Isa sa nais ni Santiago na makita ay ang mas magandang panimula dahil sa Game One ay hindi sila nakaiskor sa unang dalawang innings.
Sa kabilang banda, mananalig si coach Kiko Diaz na maitataas ng kanyang bataan ang hitting at pitching para mapigilan ang isa pang ‘perfect season’ sa Lady Falcons.
Ang rookie pitcher na si Cochise Diolata ang inaasahang muling pupukol sa State University.
- Latest
