Cone pararangalan sa PSA Annual Awards Night

MANILA, Philippines - Dalawang bagay ang nakamit ni Tim Cone sa isang season na naging da­hilan para siya ay ma­ging katangi-tangi sa ibang magagaling na coaches sa Philippine Basketball Association (PBA).

 Ang 57-gulang na head coach ang naging most accomplished mentor sa 40-taong kasaysayan ng kauna-unahang play-for-pay league sa Asya matapos niyang higitan ang record ng ‘Maestro’ na si Virgilio ‘Baby’ Da­lupan.

Si Cone din ang naging tanging coach na nakapagta­la ng dalawang PBA Grand Slam.

Ang achievement na ito ni Cone ay hindi maaaring ba­lewalain ng Philippine Sportswriters Association (PSA) kaya bibigyan siya ng karangalang Excellence in Basketball  sa Annual Awards Night ng PSA na han­dog ng Milo sa Pebrero 16.

Si Cone ay isa lamang sa mga awardees na nag­pasikat noong nakaraang taon na kikilalanin ng pi­nakamatandang media or­ganization ng bansa sa gabi ng parangal na susu­portahan ng Philippine Sports Commission (PSC) bilang major partner katulong ang Philippine Basket­ball Association (PBA), Accel, Globalport at Rain or Shine.

Ang 1973 Philippine men’s team na nanalo sa  FIBA-Asia Men’s Cham­pionship ay parara­ngalan ng Lifetime Achievement Award.

“It’s only fitting for the PSA to recognize Tim Cone with the Excellence in Bas­ket­ball honor following the outstanding achievement he did in a memorable PBA season,” sabi ni PSA president Jun Lomibao ng Business Mirror.