Galedo magdedepensa sa 6th Le Tour

MANILA, Philippines - Ang pinakamabilis na siklista ang siyang magkakampeon sa 6th Le Tour de Filipinas.

Ito ang opinyon ni indi­vidual champion Mark Ga­ledo kaugnay sa natu­rang cycling event na pakaka­walan sa Pebrero 1-4.

“Sa tingin ko mas magi­ging matulin ang karera nga­yon,” wika ni Galedo, ka­katawan para sa Philippine team, sa press launch ng Le Tour, may basbas ng UCI (Union Cycliste In­ternationale), kahapon sa Ma­nila Hotel.

Idinagdag pa ni Galedo na madedetermina na kaagad sa Stage One kung sinu-sino ang maglalaban sa Finals.

Magsisimula ang natu­rang four-day road spectacle na may total distance na 530.09 kilometro sa isang 126-km “Balanga Circuit Race” sa Balanga, Bataan.  

Mula sa Balanga ay sa­sabak ang mga siklista sa isang 153.75-km ride pa­tungong Iba, Zambales para sa Stage Two kasu­nod ang 149.34 km race pa­­puntang Lingayen, Panga­sinan para sa Stage Three.

Sa Stage Four ay mag-uunahan ang mga riders sa 101-km climb sa Baguio via Kennon Road.

“Last year, masyadong technical ang labanan,” ani Galedo, sa ruta noong 2014 na bumagtas sa Cordilleras mula sa Kayapa, Nueva Vizcaya hanggang Ba­guio. “Pero ngayon, hindi gaano kataas ang ahunan kaya maraming atake at ba­natan na mangyayari sa patag pa lamang.”

Sasabak din sa karera sina 2011 Iranian champion Rahim Emami ng Pishga­man Yzad Pro Cycling Team at si Ghader Mizbani, ang 2013 edition winner, pa­ra sa Petrochemical Team.