Huskies, Falcon gisubha’g daog sa laba caging

CEBU, Philippines – Makabungog nga daog ang misugat sa team Huskies ug Falcon sa pormal nga pagsugod sa Los Amigos Basketball Association (LABA)  Commissioner’s Cup 2014  niadtong Lunes sa gabii didto sa Banilad Sports Complex sa barangay Banilad, Mandaue City.

Pareho sab ang dalan nga gisubay sa Huskies ni team owner Dr. Raul Monteroyo ug Falcon ni Arnold Pestaño diin ilang gikontrolar ang tibuok duwa ug wala gani nila hatagi’g higayon nga makasikit ang ilang kaatbang.

Ang Huskies nimasaker sa Red Lancers ni team manager Christopher Ubas, 94-77, samtang ang Falcon walay kukaluoy nga milubong sa Romgen nilang Romeo Gastardo ug Richard Sanchez, 119-89.

Lima ka players sa Huskies ang miiskor og double figures sa pagpangulo ni Madrid, kinsa mikamada’g 18 puntos. Si Richard Bathan mikadlit og 17 puntos, gisundan ni Eugene Povadora sa iyang 15 puntos ug nilang Quiezon ug  Eboy  Quiñahan  sa  ilang 13 ug 11 puntos matag usa.

Ang napildeng Red Lancers gipangulohan sab ni Dodoy Rizane nga mipabuhagay og 15 puntos, gisundan ni  Al Yamomo nga adunay 12 puntos. Ang Red Lancers nakakuha sab og suporta gikan ni Banilad barangay councilor ug LABA vice president  for external  Gilbert Sebandal, kinsa mirehistro’g 11 puntos.

Sa laing bahin, ang Falcon ni playing coach Choy Monsanto, kalit lang miarangkada gikan sa 10-4 sa sayong bahin sa duwa aron moposte’g 17 puntos nga bentaha sa halftime, 48-31. Apan kalit  nahimong 60-31 ang iskor dihang ang Falcon  giplasan og 12 puntos tungod kay tulo ka players sa Romgen wala makatunga.

Tungod sa kadaku sa labaw, ang Falcon nakapanemaho na og sayong kadaugan.

Si Richard Jordan maoy topscorer sa Falcon nga mirehistro og 21 puntos, si Dodoy Dawal mitampo’g 18 puntos. Si Glen Rostata miamot og 13 puntos, samtang sila si J.R. Migallen ug Medillo adunay 12 puntos matag usa alang sa Falcon.

Sila si Arnel Colanse ug Banjoe Hatamosa nga mikiat sa second half mao sab ang mga topscorers sa Romgen sa ilang 26 ug 24 puntos matag usa. (BANAT NEWS)