2 ex-imports sa UV magtigi sa Cebu-Leyte PBA games

CEBU, Philippines – Duha ka kanhi reinforcements sa University of the Visayas (UV) Green Lancers ang magkontra dihang moduwa sila sa tagsa-tagsa nila ka mga koponan sa Cebu-Leyte Cup nga sugdan karong adlawa ug matapos sa Septiyembre 28.

Ang torneyo usa ka charity basketball event alang sa mga biktima sa bagyong ‘Yolanda’  sa Leyte ug sa Sugbo.

Sila si Steve Cedrick Akomo ug Mike Harry Nzensseu kauban kaniadto sa  UV Green Lancers diin gitabangan nila ang  koponan nga makuha ang kampiyonato sa CESAFI sa miaging tuig. Apan ning higayona, ang duha magkontra kay si Akomo moduwa sa Team Samsam Gullas-Panalay Tailoring, samtang si Nzensseu sa Goldstar Hardware sa Davao City.

Ang Team Samsam ug Goldstar magsangka sa alas-6 sa hapon didto sa Baybay City gym sa Leyte. Magtigi sila pag-usab sa Septiyembre 27 didto sa Minglanilla, Cebu sa dili pa magsangka sa main game ang Meralco Bolts ug Barako Bull sa  alas-8:30 sa gabii.

Ang Cameroonian nga si Akomo moduwa uban ang laing upat ka foreign players nga sila si Ramsey Williams, Christian Sentheu, Jean Jacques Manga ug Emmanuel Ojuola. Suportahan sab sila nilang  Ferdinand Lusdoc, Harold Cincoflores, Jovanie Aguilar, Patrick Cabahug, Reed Friar Juntilla, Jayford Rodriguez ug Ronaldo Bucao.

Sa iyang bahin, si Nzenseau  makigtambayayong nila ni Devon Sullivan, kinsa miduwa uban sa Thailand sa Asian Basketball League.

Ang final games gitakda sa Septiyembre 28 diha sa Mandaue City Cultural and Sports Complex diin magsangka sa first game sa alas-4 ang Barako Bull ug Goldstar Hardware, dayon ang lahugay sa Barangay Ginebra San Miguel batok sa Meralco sa alas-6 sa gabii.

Matud pa ni tournament director  Val Halen Parmis  nga ang koponang adunay labing daghan og daog maoy ideklara nga  kampiyon.

Ang mga tiket nagkantidad og P150 sa upper box, P250 sa stage, P500 sa ring side sa mga duwa sa Minglanilla, samtang  P200 sa upper box, P400 sa stage, P500 sa lower box ug P700 sa ring side sa Mandaue games. Mapalit ang mga tiket sa New Reroma Pharmacy sa Poblacion Ward 1 sa Minglanilla, Bigstart Travel assistance sa Robinsons-Talisay, Cebu Coliseum ug sa The Old Spaghetti House sa SM City-Cebu. (BANAT NEWS)