Pacman player na sa PBA

CEBU, Philippines- Nahingpit na ang katumanan sa tinguha ni eight-division world champion Manny Pacquiao nga mahimong playing-coach human siya nakuha isip No.11 overall pick sa PBA Rookie Draft kagahapon didto sa Robinsons Place sa Manila.

Si Pacquiao gikuha ra usab sa KIA Motors nga maoy koponan nga una nang mikuha kaniya isip head coach. Ang Filipino boxing icon nakasud sa first round picks nga gipangulohan sa Fil-American point-guard nga si Stanley Pringle kinsa maoy overall pick sa GlobalPort Batang Pier.

Ang 6-foot-1 nga si Pringle mao nay gilauman nga makuha sa No.1 tungod usab sa kasinatian niini sa ASEAN Basketball League. Siya ang labing unang point-guard nga nakuhang No.1 pick sukad niadtong tuig 2011 diin nahimong first pick si JV Casio.

Si Pacquiao wala makatambong sa draft kagahapon tungod kay mibiyahe kini paingun sa Macau diin mopahigayun kini og press tour aron pag-promote sa nagsingabot nilang sangka ni undefeated American Chris Algieri sa Nobiyembre 23 didto sa Venetian Hotel sa Macau alang sa WBO welterweight title.

Gawas nila ni Pringle ug Pacquiao, laing mga rookie nga mopakita sa ilang abilidad sa ika-40 season sa PBA nga buksan sa Oktubre mao sila si Letran Star Kevin Alas kinsa maoy gikuha sa Rain or Shine Elasto Painters isip No.2 pick.

Ang San Miguel Beer mipili sa No.3 nga mao si Ronald Pascual human usab nila nakuha ang katungod sa maong pick gikan sa Barako Bull Energy Cola bugti nila ni Chico Lanete ug Jojo Duncil.

Ang kanhi Gilas cadet nga si Matt Ganuelas moduwa sa NLEX Road Warriors isip fourth pick, samtang si Chris Banchero nakuha sa Alaska Aces isip No.5 pick.

Nahimong sixth pick sa Ginebra ang 6-foot-5 nga si Rodney Brondial, samtang ang Batang Pier nakakuha og laing rookie nga si Anthony Semerad sa ika-7th pick.

Mokumpleto sa top 10 pick sa first round mao sila si Jake Pascual nga napunta sa Barako Bull, Jericho Cruz sa ikasiyam sa Rain or Shine, David Semerad sa Blackwater sports sa ika-10 ug Juami Tiongson nga maoy 12th pick sa Blackwater. (BANAT NEWS)