Shakey’s V-league puwesto sa quarters asam ng Turbo Boosters
MANILA, Philippines - Puwesto sa susunod na round ang nakataya sakaling maipagpatuloy ng PLDT Home Telpad Turbo Boosters ang pagpapanalo sa Shakey’s V-League Season 11 Open Conference ngayon sa The Arena sa San Juan City.
Katunggali ng Turbo Boosters ang wala pang panalong PNP Lady Patrollers sa ganap na alas-2 ng hapon at ikaapat na sunod na panalo ang masusungkit ng koponan sa ligang inorganisa ng Sports Vision katuwang ang Shakey’s bukod sa suporta ng Accel at Mikasa.
Sapat na ang apat na panalo para makatiyak ng puwesto ang PLDT dahil hindi na makakaabot sa ganitong numero ang alinman sa PNP at UP na may 0-3 at 0-4 karta.
Ang mangungunang anim na koponan ay aabante sa quarterfinals habang dalawang mangungulelat sa walong naglalaban ay mamamaalam na.
Pagkakatangkaan ng nagdedepensang kampeon Cagayan Valley Lady Rising Suns ang makabangon agad matapos lumasap ng unang pagkatalo sa pagsukat sa palaban ding National University Lady Bulldogs sa ikalawang laro dakong alas-4.
Nakita ng Lady Rising Suns na natapos ang 17-game winning streak sa conference na ito nang dumapa sa PLDT sa straight sets para makatabla ang NU sa 1-1 karta.
- Latest
