Sundown Beer Run gibanhaw

CEBU, Philippines -  Nahingpit na ang mga detalye alang sa labing unang Sundown Beer Run sa Abril 26  didto sa Lapu-Lapu City Hall grounds.

 Kini ang pagbalik sa maong talagsaong fun run nga unang nahitabo niadtong tuig 2012. Ang lumba sugdan sa dili pa mosawop ang adlaw ug lahi kaniadto nga sa tungang gabii na sugdan.

 Atol sa  paglusad  sa maong kalihukan kagahapon didto sa Sunburst Mango, si Lapu-Lapu City councilor ug race organizer Harry Radaza nagkanayon nga gibalik nila ang lumba tungod sa daghang mga running enthusiasts nga mihangyo kanila nga ibalik ang Beer Run.

 Ang lumba gibuak ngadto sa 6K ug 3K run. Mao kini ang  bugtong beer run sa Asya ug ika-10 sa tibuok kalibutan.

 Gawas sa nagbaha nga beer, may ibutang sab nga "pulotan’ station alang sa mga runners.

 Sama sa unang edisyon, walay ilhon nga top finisher sa lumba, apan makadawat og pahalipay ang mapiling "drunken master" ug "team tagay."

 Ang maong lumba kabahin sa mga kalihukan sa  "Kadaugan sa Mactan" sunod buwan.

 Niadtong  interesadong mosalmot, ang registration fee nagkantidad og P250 lakip na ang singlet alang sa unang 500 registrants. Ang partisipante kinahanglang nagpangedaron og 18-anyos ug pataas.  Mahimong magparehistro sa Runnr sa Ayala Center-Cebu, Parkmall ug Lapu-Lapu City Hall.