CEBU, Philippines - Nangapukling ang mga seeded teams sa Western Conference sa tagsa-tagsa nilang duwa kagahapon sa nagpadayong National
Basketball Association sa managlahing binyu.
Ang kanhi Northwest Division leader Portland TrailBlazers gilubong sa Memphis Grizzlies, 91-98, samtang ang Golden State
Warriors nabihag sa Washington Wizards, 85-88.
Si Zach Randolph mihimo'g 23 puntos uban ang 10 ka rebounds aron pangulohan ang Memphis. Si Mike Conley miamot og 19
puntos ug pito ka assists aron mokulit og dakung daog didto sa korte sa TrailBlazers. Silang Marc Gasol ug Courtney Lee mitampo'g 15 ug
12 puntos matag usa alang sa Grizzlies nga nagbitbit karon og 23-20 nga baraha.
Si Randolph, ang kanhi forward sa Blazers, mirehistro sa iyang ika-27 nga double-double karon nga season ug franchise-leading
nga ika-190 alang sa Grizzlies.
Ang Blazers nga biya karon og tulo ka duwa sa Oklahoma City Thunder sa Northwest Division, gipangulohan ni Lamarcus
Aldridge pinaagi sa iyang 27 puntos ug 16 ka rebounds, apan midailos na sila karon ngadto sa 33-13 nga baraha.
Nabugto sab sa Grizzlies ang lima ka home winning streak sa Portland nga nahimong 18-5 rekord sa kasamtangan.
Mao kadto ang una sa tulo ka duwa sa regular season tali sa Memphis ug Portland. Ang sunod duwa karong Marso 11 didto sa
FedEx Forum, ang korte sa Grizzlies ug ang ikatulo sa Marso 30 didto sa Portland.
Sa laing bahin, si Bradley Beal mikudlit og 19 puntos, pito ka rebounds ug upat ka assists aron maoy mangulo sa Wizards.
Ang tandem nilang Stephen Curry ug Klay Thompson mao sab ang migiya sa Warriors. Si Curry mibahog og 23 puntos,
samtang si Thompson miamot og 13 puntos. (BANAT NEWS)