So, Karjakin tabla

MANILA, Philippines - Itinulak ni Filipino Grand­master Wesley So sa draw ang laban nila ni GM Sergery Karjakin ng Russia matapos ang 51 moves ng Queen’s Indian Defense at  manatiling kasalo sa ikaapat na pu­wes­to sa seventh round ng  76th Tata Steel Tournament Masters sa Rijksmuseum, Amsterdam nitong Linggo.

Hawak ang mga pu­ting piyesa, sinamantala ni So (ELO 2719) ang ka­pabayaan ni Karjakin sa pagsakripisyo niya ng  rook para sa knight sa 24th move ng Bxg2.

Bagama’t quality down (hawak ni Karjakin ang five pawns, two knights at two rooks, kontra kay So na may five pawns, two rooks at black bishop), nagpatuloy ang pag atake ng Ruso sa f2 pawn ni So kung saan napuwersa ang huli na ibigay ang kanyang quality up advantage matapos magpalitan ng piyesa na nauwi sa drawish position

At dito na nagkasundo ang dalawa na maghatian ng puntos sa 51 move kung saan hawak ni Karjakin ang four pawns at rook habang ang Pinoy ay may four pawns at rook din.

Ang naturang draw ay naglagay kay Karjakin sa ika­lawang puwesto kasama ang Ducth teenager na si Anish Giri na may 4.5 puntos.