Umiskor ng TKO victory sa ninth round: Donaire umulit

MANILA, Philippines - Magkatulad na resulta, ngunit sa magkaibang round.

Muling ikinonekta ni dating unified world super bantamweight champion Nonito ‘The Filipino Flash’ Donaire, Jr. ang kanyang matulis na left hook para pabagsakin si Vic ‘The Raging Bull’ Darchinyan sa ninth round sa kanilang rematch sa American Bank Center in Corpus Christi, Texas.

Ganap na itinigil ni referee Laurence Cole ang pag­rapido ni Donaire kay Darchinyan sa 2:06 ng ninth round sa kanilang non-title, 10-round featherweight fight.

Sa kanilang unang paghaharap noong Hulyo ng 2007 ay isang left hook ang pinadapo ni Donaire sa panga ni Darchinyan sa fifth round para agawin sa Armenian fighter ang mga suot nitong International Boxing Federation (IBF) at International Boxing Organization (IBO) flyweight titlies.

 Sa kanilang rematch ay lumamang ang 37-anyos na si Darchinyan sa scorecards ng dalawang judges, 78-74, 78-74 at at tabla sa pangatlong judge, 76-76.

“I tried to work on a different style, I tried to go back,” sa­bi ng 30-anyos na si Donaire. “The funny thing is, it didn’t work because I wanted to fight.”

Nakalusot ang isang left hook ni Donaire (32-2-0, 21 KOs) kay Darchinyan (39-6-1, 28 KOs) sa pagsisimula ng ninth round.

Ang ikalawang left hook ni Donaire ang tuluyan nang nagpatumba kay Darchinyan.

Nakatayo ang Armenian na kumakalog ang mga tu­hod.

Kaagad siyang nirapido ni Donaire kasunod ang pagpapatigil ni Cole sa laban.

Sa isang bahagi ng kanilang laban ay nakakonekta si Darchinyan ng isang left hook kay Donaire.

“When he hit me in the cheek, I felt like he broke my cheek, and I thought, ‘Is this it for me? I’m losing the fight. Should I keep going?’ But I put my heart into it, and you know what, I will never, ever quit,” ani Donaire.

Ito ang unang laban ng tubong Talibon, Bohol sa fea­ther­weight division matapos maghari sa flyweight, ban­tam­weight at super bantamweight classes.

Hinirang si Donaire bilang ‘Fighter of the Year’ noong 2012 matapos talunin sina Jeffrey Mathebula, Wilfredo Vasquez, Jr., Toshiaki Nishioka at Jorge Arce.

Noong Abril 13, 2013 ay tinalo siya ni Guillermo Ri­gondeaux ng Cuba sa kanilang unification super bantamweight fight.

Sinabi ni Donaire na maaari niyang hamunin si Rigondeaux para sa isang rematch.

Bago pa man ang kanyang panalo kay Darchinyan ay sinabi na ni Donaire na plano niyang hamunin si World Boxing Organization (WBO) featherweight king Orlando Salido ng Mexico. (Russell Cadayona)