Stags magpapalakas vs Blazers

MANILA, Philippines - Ikalimang sunod na panalo na magdidikit sa pumapangatlong Letran ang pagsisikapang gawin ngayon ng San Sebastian sa pagharap sa St. Benilde sa pagpapatuloy ng 89th NCAA men’s basketball sa The Arena sa San Juan City.

Lumasap ng di inaasahang 64-87 pagkadurog ang Letran sa kamay ng inspiradong Emilio Aguinaldo College upang mabuksan ang pintuan sa mga koponang nasa ibaba na magkaroon ng tsansa para sa ikatlong yugto.

Ang Stags na  may 8-5 baraha at nasa ikaapat na puwesto ang isa sa mabibiyayaan kaya’t tiyak na pupukpok ang koponan sa pagharap sa host St. Benilde sa ganap na alas-4 ng hapon.

May four-game winning streak ang tropa ni coach Topex Robinson at huling tinalo ay ang Lyceum, 58-53.

Sa kabilang banda, ang Blazers ay may 5-8 baraha at may limang laro na lamang ang natitira sa kanilang iskedyul at dapat nilang maipanalo ang lahat ng ito para gumanda ang tsansa na makahirit ng playoff para sa Final Four.

Ganito rin ang sitwasyon ng Jose Rizal University at Arellano na magtatapat sa tampok na laro dakong alas-6 ng gabi.