CEBU, Philippines - Magbagat pag-usab ang defending champion University of the Visayas (UV) ug ang University of San Carlos (USC) sa finals
human ilang gipangpukan ang tagsa-tagsa nila ka kaatbang sa semifinal sa BEST Center SBP Passerelle Twin Tournament nga
gipaluyohan sa Milo.
Ang UV milubong sa Don Bosco Technology Center (DBTC), 54-30, samtang ang USC midaog batok sa Sacred Heart School-
Ateneo de Cebu (SHS-AdC), 58-48.
Sayo kaayong naglabaw og double figures ang UV, 21-10 pinaagi sa 15 puntos ni Joshua Flores. Ilang nainat ang labaw ngadto
sa 33-18 sa halftime ug napugngan nila ang DBTC ngadto lang sa singko puntos sa third quarter aron moburot pa ilang labaw ngadto sa
48-23 paingon sa final period.
Si Flores maoy nangu sa UV sa iyang 15 puntos.
Sa laing bahin, human milabaw og 13-5 sa first period, si Clint Octaviano mibahog dayon og 10 puntos aron giyahan ang USC
pagmentinar sa ilang double digits nga labaw hangtod na sa final period.
Sa mga duwa sa CYBL D-League, ang St. Benedict Child Learning Center mikulit sa ilang ikaduhang daog human sila maka-
eskapo batok sa DBTC, 25-23 sa Under-10 division.
Midaog sab ang USJ-R batok sa USC South, 36-28.
Sa duwa sa D-League SBP division, ang USC North-B nagbitbit na og 3-0 nga baraha dihang ilang gilubong ang DBTC-C sa
iskor nga 57-24. Mao usab ang USC South-B mihirit sab kini og 3-0 nga baraha pinaagi sa pagpaluhod sa Virgen de las Escuelas Pias
School (VEPS), 63-31.
Mikulit sa labing una nilang daog ang USC North-C pinaagi sa pagpukan sa St. Benedict, 36-24, ang USJR-B naka-eskapo bitbit
ang 29-27 nga kadaugan batok sa DBTC-B ug gipukan sa Thumbs Up 1 ang USC South C sa iskor nga 40-32.
Sa D-League Passerelle division, ang SHS-AdC C milubong sa DBTC-B sa iskor, 50-28, samtang ang Thumbs Up 2 midaog sab
sa USC North-B, 63-60.
Ang CYBL D-League usa ka developmental league sa mga SBP Passerelle schools diin adunay misalmot nga 35 ka teams nga
gibahin-bahin ngadto sa Under 10, SBP (Under 12) ug Passerelle (Under 15) age bracket categories.
Gawas pa niini, aduna pay laing 13 ka regular teams nga nagduwa sa BEST SBP Passerelle Twin Tournament nga gipaluyohan
sa Milo. (BANAT NEWS)